蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年03月30日

網上行寬頻獨市地區加價170%

網上行的唐樓和村屋用戶接獲加價通知,月費加至298元或以268元簽約兩年。

【記者陳家偉、伍雅謙報道】電訊盈科旗下網上行狂加價,唐樓、村屋和離島住戶加幅高達50%至170%,用戶由於「冇得揀」,怒轟「好似俾人打劫咁」,又指「你鋪光纖我條氣都順啲」,卻只得約3至8Mbps的寬頻服務。香港資訊科技商會會長方保僑指,以4G手機分享WiFi上網,「唔會慢得過」寬頻上網。
網上行用戶近期收到加價通知,居住在唐樓、村屋和離島的用戶,由原來的百多元月費,勁加至298元,或以月費268元簽約24個月。該等住戶一般都只有網上行提供寬頻服務。有職員透露,今次加價主要是100Mbps以下服務。

「好似俾人打劫」

土瓜灣唐樓用戶彭先生,原本月費148元,被加價101%,但網速只有3Mbps。居住元朗村屋的梁先生,月費由110元加至298元,加幅高達170%,「難以接受,加價都要有個漸進式,唔係咁一次加」。
住在錦田村屋的孫先生稱:「又唔係鋪光纖,鋪光纖我條氣都順啲。」他使用的8Mbps寬頻原只需190元,現加價57%。
梅窩住戶張小姐更直言:「我哋冇得揀,兩年加咗100%,好似俾人打劫咁!」她打算以手機分享WiFi,拒絕再與網上行簽約。
網上討論區也有不少網民炮轟加幅離譜,認為網上行「搶錢」。有網民坦言在「冇得揀」下,無奈續約,惟擔心完約後會再加價。也有網民表示要「逃離」網上行,情願用手機分享WiFi上網。

收費因地點而異

寬頻上網的收費因地點而異,部份大型屋苑如淘大花園、麗港城、太古城,月費由208至238元,但有30至100Mbps網速。公屋和居屋,200Mbps光纖服務,月費168元,暫未加價。
香港資訊科技商會會長方保僑表示,「300蚊裝到3G有突,398蚊已經有4G,唔會慢得過(寬頻上網)」,若認為寬頻太貴,可選擇以手機分享WiFi上網。
電訊盈科回覆指,因要持續投放資源提升網絡系統,故需調整收費用;惟未有回應加價是否針對村屋或唐樓住戶。通訊事務管理局稱,電訊服務收費乃電訊商的商業決定,毋須當局批准。
現時本港估計有數萬間村屋,以及4,000多幢50年以上樓宇,住戶數目數以十萬計。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載