蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年03月27日

穿梭中環 蔡東豪猛然發現︰ 
人到中年難忍無普選

【公司行政總裁】蔡東豪上周收到記者WhatsApp相約訪問談佔領中環,他24小時內就決定公開表態將會參與。穿梭中環商界,他一直認為爭取普選「自然有人做,我哋唔使理」。但人到中年猛然發現,等到2017年仍未有真普選。他避無可避、忍無可忍,決定不再做政治上的沉默大多數。

記者:雷子樂 許偉賢 呂麗嬋

相關新聞:田北俊:普選方案「半真半假」

昨晨出門前,蔡東豪告訴太太,會向記者表明決定佔領中環。「佢只係微笑,咁如果佢好唔想我做,我諗由朝早到𠵱家,佢會有所行動」。49歲的蔡東豪是精電國際有限公司行政總裁,從前是個中環人,曾在長江基建、中建電訊等公司任職,如今在觀塘出沒,偶爾穿梭中環,最了解商界精英的想法。他自己也曾一樣,埋首搵錢,甚少關注政制發展、讀政治新聞只看標題,最初連戴耀廷也講錯做「戴廷耀」。

「中國擁抱民主會更強」

「我從冇埋怨中環人點解咁保守、唔肯為民主奮鬥,我哋唔會傾呢啲嘢喎」。生意關係,蔡經常北上,對民主有更深體會,「點解內地咁多(價值觀)扭曲,唔排隊、貪污、破壞環境,全部同冇民主有關。如果中國能夠擁抱民主,佢會變得更強大!」
香港過去也不一直有自由、沒民主,卻不斷創造經濟奇蹟?「咁英國係有民主喎。97前,你係唔可以亂嚟,indirectly我哋有過(民主),有乜嘢,係嗰邊(英國)有聲出喎」。他理解回歸後有過渡期,普選要等,但現在「由97搞到2017」仍未見普選真身,「你𠵱家隊兩條友畀我去選,梗係唔係真普選啦!咁我覺得夠啦,你講好咗有㗎!我接受唔到囉!」
人到中年,他更覺不能再避再忍,讓北京一拖再拖,「咁你2017冇(真普選),再下一屆2022,年份好得人驚。唔係聽晚唔得閒食飯後晚食,數吓數吓我都老喎!2022年,等九年,大佬,我(到時)就60歲啦!」

相關新聞:盧先亞︰你唔好恰我哋

「余若薇選就係真普選」

他想告訴中環精英,做生意,若看長線,很應該為下一代爭取民主。他不怕走得太前會影響工作,「我相信,同我有關係嘅公司會理解我,可能佢就係鍾意我寸寸貢!」「(公司)都係睇你做得好唔好,你做得好,咪話你多樣化;做得唔好,話你多事囉」。
蔡東豪深明佔領中環有如北韓搞核試,是一種談判策略,「我諗北韓唔係真係要射核彈去紐約,但有嗰件嘢喺度就有得傾。由𠵱家開始,多1,000個李柱銘、多1,000個蔡東豪出嚟,咁呢個就係北韓嗰啲嘢,咁奧巴馬都要check吓,係好緊要」。蔡自言不熟悉政治,不了解甚麼提名委員會、六部曲、佔領中環商討日。檢視政改方案,他的方法十分簡單:「畀到余若薇選,就可以證明佢係真普選。」一旦佔領行動成事,蔡說會站在李柱銘附近,「相對上最安全」。他又怕透過記者未必能清楚表達意思,特別自撰600字,道明心路。明年街頭抗爭,將增添一點中環智慧。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載