蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年03月13日
馬上成為壹會員

專題:怪獸家庭子女崩潰實錄

家長過份緊張演變成怪獸家長,怪戰家庭最終引發各種兒童心理病。
父母以為放任孩子有助發揮,怎料換來當街尖叫;以為照顧周到,卻變成飯來張口;有子女因父母意見分歧而變成磨心,更甚者,為人妻者集中注意在子女,反將老公「送咗」俾工人偷情都懵然不知。

做父母的都將注意力過份集中在子女身上,最終出現三種常見現象,包括不自覺地出現過分放縱或過分緊張的現象,又或者夫妻間因管教問題上出現爭執。在這三種常見問題下成長的孩子,難免會出現心理問題,更嚴重的,甚至會變成婚外情的導火線。
好多家長以為為子女安排好切是為他好,無論起居生活、吃甚麼、做甚麼、讀書上學、上班,甚至結婚,父母都為孩子準備妥當,根本無機會讓孩子自已處理問題,孩子未出聲,已經幫他做東做西。
主治家庭及兒童問題的臨床心理學博士鄭穎珩(Viviana)憶述:「曾經接觸一個13歲青年,衫又著唔好,扭又唔識扣。我以傾談的方式引導佢,發現佢內心自卑得來懶散,覺得媽咪咩都會幫佢做哂,所以咩都唔需要識。」
相反,有些家長任由孩子話事,以為是痛錫,但當無知的孩子擁有話事權後,會變得無大無細,最終讓孩子養成難以修復的壞脾氣。「有個小朋友來睇症,喊得好淒涼兼碌地沙,走嗰時嚇親啲護士。傾多幾次偈後,原來家長一直任由佢話事,當佢出外遇到不滿就大發脾氣。佢會覺得:『點解係屋企可以發脾氣,係街就唔得呢?』佢會覺得好困擾,問題解決唔到就大喊發洩。」Viviana指,這便是過份放縱的後果。
家長必須控制小朋友,待他們喊夠鐘就要停,不能再繼續發脾氣,家長要在旁重複勸導,讓他們知道社會是有規矩的。
父母因教育意見分歧,也會影響到小朋友,Viviana憶述其中一個案例:「之前有個4歲男孩經常不斷地眨眼,母親帶佢嚟睇症,小朋友點都唔肯講嘢,唯有叫佢將屋企嘅情形畫出來,佢筆下 嘅一家三口,小朋友縮作一團夾在父母中間,原來佢成日見到父母鬧交,所以好唔開心,而呢個亦都係佢成日不自覺眨眼嘅背後原因。」最後我建議呢對父母,先要在管教問題上取得共識,並從新花時間教導及糾正小朋友的怪異行為。
除了因家長教導問題而形成的兒童心理病外,原來不少婚外情,都是由過分緊張孩子的母親一手造成。「曾經有個5歲大的男孩經常發脾氣和哭鬧,當時父母已經開始搞離婚,媽咪以為佢因此而唔開心,點知我同小朋友傾偈時佢講話,因為見到爸爸同工人姐姐拖手而好唔開心,所以發脾氣。當時媽咪仲未知道呢件事。」
就上述個案,Viviana雖然予以一段頗長時間的輔導,但結果該對夫婦都以離婚收場。「我成日講,做媽咪的首先要學識雙眼唔好只顧望住個仔,要多啲留意同欣賞身邊個老公,做父母有足夠的溝通,先可以讓孩子身心健全地發展。」

解畫和讀心機

除了透過面見傾談作心理輔導外,還會用到手偶公仔、讀心器或沙池等。傾談是心理輔導必須用直接的方法,小朋友在陌生環境多數都表現得沉默,所以常以畫畫的方法,讓他們畫出心事;還可用手偶公仔,以角色扮演方法來引導小朋友說出問題,如向第三者說話,可減低小朋友的不安感,一般作輔導用的手偶公仔,都會是一對男女,方便扮演不同角色。
家庭治療則多用讀心器(機名:Biofeedback),因為好多時小朋友唔敢講出真話,怕被父母責罰,治療時可能講大話,透過這部儀器,可量度病人解答問題時的心跳、手汗和體溫變化,從而了解他們的心理狀。

港爸媽認怪獸家長

記者日前到名校林立的九龍塘訪問多位幼稚園及小學家長,他們普遍認為自己算是怪獸家長。
林先生:「一星期安排三樣活動俾個仔,報學校一定要有課外活動,呢個教育制度,即使成績低啲,但只要有一項課外活動叻,好多時啲名校都即刻收。個個(家長)都係為咗咁而俾小朋友學,唔係邊有咁多人學呀。」
另一位媽咪梁小姐覺得香港生活節奏急速,為了快人一步,好多事情都會幫女兒完成。「阿女今年6歲,現在一星期參加4樣課外活動,星期六、日休息或參觀博物館等,暑假可能報埋英文班或小學預備班。生活上為咗快,好多事都會幫佢做哂,如著鞋仲未識綁鞋帶。」她自認半個怪獸家長,但唔算過分。
法會議員李慧琼(囡囡十歲)自認怪獸家長:「呢個只係一個代名詞,身邊好多人覺得『人人都咁做,點解要話自己係怪獸呢?家長望子成龍本來就係好事。』其實我同好多家長一樣,俾小朋友學習一體一藝一語文,現在每星期都有學鋼琴、游水、合唱團及英文班,已經唔算多,為咗升到英中名校學校,確保將來可以穩佔香港僅有的18%大學學位之一,根本冇得揀。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載