蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年03月12日

圖簿:筋肉女郎 一顆恨嫁心

中國人迷信統一,就連美感標準也要一致,V煞面、間尺鼻等倒模式臉容,不合比例的誇張身材,令男士們唾涎,女士們邊鬧邊跟風,撞樣易過撞衫。健美女將古少顏(Koobie)挑戰這個準則,操得一身橫練肌肉,在多個健美比賽摘下桂冠。
Koobie不但外表很man,連內在也不像女人,每次備戰禁飲禁食趕絕脂肪,打亂了荷爾蒙分泌,故此每次都經歷三個月牡丹「停經」夢,這個美感新定義代價不菲,女士們仿傚前宜應三思。 撰文:潘婉玲 攝影:胡智堅

雄兔腳撲朔,雌兔眼迷離,兩兔傍地走,安能辨我是雄雌,古少顏一身運動裝束,黝黑膚色配上一頭短髮,再加低沉略帶沙啞的聲線,記者幾乎當她是男人,的確,Koobie走在街上時,一半途人搞錯,難得當事人處之泰然,「我照應佢囉,咁我知佢叫我,人地唔知,嗌錯好出奇咩?」
33歲的Koobie現職健身教練,楊千嬅丈夫丁子高也是她的客仔。2003年起她先後參加過九次健美小姐比賽,四度奪冠,包括去年七月於國際健美健身邀請賽52公斤級。在台上騷首弄姿,展示肌肉,風光背後辛酸卻不足為外人道,比賽前半年嚴格控制飲食,「雞肉全部烚既,菜一定係白烚,炸一定唔駛諗。荷爾蒙都會受影響,嗰段時間(三個月)無period(月經)。」
比賽前數天,連飲水也要控制,「只係漱口,或者濕吓個嘴囉,比賽嗰刻脂肪比率得番8%至9%。」正常女性脂肪佔25至31%,記者直呼Koobie接近變態,但卻樂在其中,「你哋話最辛苦,其實係我覺得最刺激嘅時候,上台嗰刻反而最放鬆,因為終於可以現真身喇。」
這個真身瘦到臉頰凹陷,胸部亦沒有多餘脂肪,這種美,世俗男士可能無福消受,Koobie只好孤芳自賞,「我嘅身體就好似人型雕塑,平時嘅訓練、比賽前嘅準備,將我嘅線條美一一勾畫出嚟。」自賞甚至演變成自戀,但她強調只限於比賽場上,「唔自戀就唔可以騷肌俾人睇啦,膽怯點話俾人知你練到啲咩?一定嘅自戀係需要㗎。」

眼前這座雕塑從小愛運動,曾為母校立下不少汗馬功勞,中四後便輟學投身社會,寧做侍應也不當OL,把父母氣個半死,「阿媽鬧,細時唔讀書,大個做乞兒。」初次目睹女兒健身,著實嚇了一跳,「我推緊胸,每邊40磅,突然聽到媽咪把聲:『咁重!得唔得㗎?隔離個男仔先舉緊35磅咋喎!』」
誰知女兒一踏上台板,媽媽即成為頭號粉絲,「比賽完之後,佢都會揀啲相曬出嚟,原來佢袋住本相簿,拎返公司畀同事睇。」每逢比賽,家人朋友總會拉大隊到場支持,任職髮型師的妹妹更是御用形像指導。
Koobie一身肌肉雖令很多男士自愧不如,但也引來不少裙下之臣,只是她一句「唔啱feel」,統統拒諸門外,擇偶第一規條,拒絕悶男,「拍拖淨係行街睇戲食飯?可唔可以加保齡?行街我同朋友行都得啦!睇戲?我買碟返屋企睇一百次都得!」擇偶第二規條,拒絕脂肪,肥仔倒可接受,但要接受體型改造,「我會建議佢一齊做運動,令到佢瘦囉。」
煙花絢爛卻也短暫,Koobie深明操肌生涯不長久,四十歲左右便夠期引退,尚餘七年時間,Koobie期望衝出亞洲,參與國際賽事。唯人生的終極目標還是披上婚紗,踏紅地毯,生兒育女,然而Koobie於2007及08年一共參加了四項比賽,換言之每年停經六個月,試問如何懷孕?「都擔心㗎,所以我唔會太密集咁比賽。」每年有一半時間停經算不算密,真是杯水半空還是半滿的哲學問題。
記者祝福她終有一天變成幸福肥師奶,可她自言做師奶ok,肥胖no
way,「我爛船都仲有三斤釘,好快修返架,唔一定瘦,但唔會肥,你靚過就唔會比自己唔靚。」世上沒有醜女人,只有懶女人,姊妹們,共勉之!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載