› 選擇地區
三藩市
紐約
洛杉磯
其他美國地區
香港 台灣 北美
 
2013年03月05日

門常開:驚蟄怒打狼英趕禿鷹

今年車公靈籤叫香港要提防小人,今日係中國二十四節氣中嘅驚蟄,蛇蟲鼠蟻空群而出,梗係要打小人趕走啲衰嘢。香港近年小人當道,灣仔鵝頸橋下嘅神婆生意勁旺,噚日開始排長龍,打小人每個收50蚊,五分鐘打兩個,隨時好賺過做醫生,創造打小人經濟奇蹟。

堪輿師司徒法正話打小人就似落降頭或施咒語,最好連埋時辰八字一齊打,越多人打同一個目標就越有效。但記住要用人做單位,例如打「地產霸權」就要講明邊個商家,實行打到佢有舖冇租加!
吳爽

立法會議員梁國雄

「第一個要打害李旺陽同劉曉波嘅人,即係打阿爺(國家領導人)囉。香港就想打酷吏「鷹猿雜種」,即係「禿鷹」曾偉雄同「強國猿」袁國強嘅混合力量。」

網民陳梓進

「一定要打梁振英個嘴,因為佢誠信有問題,競選話聽民意,其實只係做show(表演)。第二想打中國共產黨,因中港矛盾係由政權教育嘅錯,唔係市民嘅錯。」

狼英前頭號粉絲劉夢熊

「吓?(打小人)……呢個不予置評啦!」

立法會議員范國威

「最想打梁振英,因為自由行同八萬五政策都關佢事,問題多多害到香港雞毛鴨血,正一災星累街坊,打佢個小人頭,等佢唔好再壞腦諗屎橋害人。」

教協教研部主任張銳輝

「要打財爺曾俊華,庫房咁多盈餘,但15年免費教育都冇影,反而畀4.8億資助尖子去留學,完全錯配。教育局局長吳克儉至常秘都冇制訂好教育政策,抵打。」

才子陶傑

「邊個係小人?睇我《爽報》專欄就知。打小人呢啲咁嘅小農行為,與本人形象不合,所以唔會打!」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載