› 選擇地區
三藩市
紐約
洛杉磯
其他美國地區
香港 台灣 北美
 
2013年03月04日

爽爆:父吸毒 母走佬 BB終生無名

【獨家訪問】BB由生到死只有短短的三個月,名字未取,連一張出世紙都沒有。父親是個道友,母親在夜總會做公關,BB一出生,媽媽就頭也不回地跑掉。凌亂不堪的家中,除滿佈雜物外,警方也找到不同種類的毒品。
BB的死因,警方懷疑有可能是吸入二手毒霧,也有可能是被雜物壓住窒息。誰知道呢,在這樣的家庭成長,或者死亡才是一種解脫。
《爽報》記者找到這個不負責任的爸爸,他仍不斷找理由為自己開脫。 記者:謝志輝 攝影:成笑

BB死亡事件發生在2月24日,地點在黃大仙上邨啟善樓一單位,警方到場調查期間,揭發屋內藏有毒品及吸食工具,分別以涉嫌疏忽照顧兒童及藏毒罪名拘捕男嬰的祖母及父親。二人目前仍保釋候查,記者走訪黃家,12歲大仔清楚記得當日事發情形。
「爸爸突然喺廳叫得好大聲,猛叫『細佬細佬唔好死、唔好死』,我踏出房,只見到爸爸抱住細佬跪喺地下不斷哭叫,細佬塊面灰灰白白,個口張開咗,已經冇晒知覺。我喺慌亂中幫爸爸打電話報警,救護員嚟到將細佬送院嗰一刻,爸爸仲不斷喊住問救護員細佬可唔可以救得番」。

遺憾無法送BB最後一程

大仔說,平時是由嫲嫲和爸爸二人分工照顧細佬,早上則是爸爸及細佬同睡一床,搞不清楚為何出事了。「我真係好掛住細佬,佢平時好鍾意笑,如果唔係自己噚晚玩得太夜,早啲起身望下,就可能救得番細佬」。BB的母親呢?大仔無語,據知黃父是夜總會大班,孩子母親也是在夜總會認識,感情基礎不穩,BB一出世,母親就跑掉了。黃父向記者說自己這幾個月來,都有到油尖旺一帶夜總會,逐家逐戶去找個「衰婆」,但都沒有結果。
大仔則是和前妻所生。「我同前妻已經離咗婚六、七年,因為吸毒問題而分開。戒毒兩年之後,又因為販毒喺赤柱監獄度過四年半,法庭當時將撫養權判畀前妻,但佢見爺爺嫲嫲好錫個孫,就放心交畀佢哋,𠵱家大仔12歲已經非常懂事,前妻亦另有家庭,久唔久會返嚟探望兩老同個仔」。
對於警方懷疑他吸毒累死BB,他猛說與自己無關。「BB啱啱出世,個女人就離開咗我,我可以做啲乜?人會受打擊,但我知BB一日一日長大,我咁樣係唔得。我真係冇high完嘢害死個仔」。他說話有點語無倫次,但記者大概聽得出,他承認有不良習慣,卻指BB不是被毒品害死。
記者於是質問他,家中被查出有毒品是甚麼一回事,他的解釋則更離奇了。「唔記得啦,警員喺屋企搜出幾多毒品,我都唔記得喇,應該係幾年前遺留落嚟嘅!」
他見記者滿臉疑惑,於是也急了,大聲說:「做父母有邊個想個仔死?個個人都想個仔健康陪住自己啦!最初警員喺醫院拘捕我時,話個仔有番心跳,自己都安樂番啲,但當醫院通知我家人見個仔最後一面嗰時,我想即刻去醫院睇BB,因為人喺死亡邊緣掙扎嘅時候,梗係想屋企人叫返佢返嚟!但警員唔俾我去,我想喺佢身邊叫佢返嚟都做唔到。」
他哽咽說,現在最大心願是給BB一個名字,辦好身後事及還自己一個清白,所以答應接受訪問。「作為一個父親,個仔離開咗我,好難過,我呢一刻唔會理其他人點樣話我衰,我真係問心無愧」。

為辦死亡證才領出世紙

言談之間,記者才知道,原來BB出事前一星期已持續有病,但他卻從未帶BB去看醫生,而理由竟是未領出世紙。「件事唔係我想㗎,初初想訩出世紙嗰時,我話『BB只得我,冇媽媽喎!』入境處職員話唔可以辦手續,因為你哋未結婚,所以一定要父母一齊嚟申請,但我搵唔到佢媽媽,入境處話幫我查,但到事發當日,都冇覆要點樣先訩到出世紙,冇出世紙根本就睇唔到醫生,你明唔明呀!」
記者告訴他,父母任何一方都可為BB領出世紙,他這個解釋難以令人置信。而且為人父親,黃父的生活態度不是迷幻,便是太無知,最後在記者協助下,他才到入境處為BB辦出生證明及死亡證。出世紙填甚麼名字,他倒早想好了:「最初幫BB改名叫文希,希望大個有文采,唔似爸爸咁冇學識,但爺爺話個名欠火欠土,最後定名為汶曦!」
BB在世三個月,得不到愛,但總算有個名字,他叫黃汶曦。

你想爆?幫你爆!

熱線電話:2990 7225
WhatsApp:9131 4511
mailto:Bom@sharpdaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載