蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年02月27日
馬上成為壹會員

爽人物:險撞冰山 滿天飛魚
行船仔的監獄漂流

鍾永亮,26歲,愛大海的港產「行船仔」,剛自太平洋歸來。八個月的海上生活,沒Wi-Fi、沒手機,工作以外,在太平洋海上,靠用掃帚打垃圾波和在甲板扮超人自娛。「行船」是男人的浪漫?「呃人㗎!似坐水監就真!」240個日與夜,經歷過大風雨、差點撞上大冰山,遇過滿天飛魚和美絕的耶穌光,猶如少年Pi的海上奇幻旅程。他口中移動的監獄,果真千變萬化!記者:呂麗嬋

「之前離開香港八個月,過埋農歷年先走,好快又要再上船,可能要到年底先再返香港嘞」。本港有逾百間船公司,港產船員只有200人,年輕人入行,鳳毛麟角,阿亮是其中之一。染了一頭金髮、左耳釘了個大耳窿的他,外形潮爆,雖沒有電影《天涯海角》中扮演海員的王敏德高大有型,也像極無腳雀仔,「每個人入行理由唔同,我入行係因為鍾意海!」驟耳聽來,多浪漫!只是阿亮的故事卻由混沌開始。

對海的渴慕成動力

「未行船之前,嚴格嚟講,我冇做過一份長工」。會考一分,讀過毅進、副學士先修班,眼前戴着鴨舌帽的潮人阿亮,說話有紋有路,但他不違言曾經迷失,「20歲以前嘅我,好混沌,愛水上活動,夏天做吓救生員,冬天去工廠做吓散工,搬搬抬抬,餐搵餐食」。2008年打波跌斷手,經朋友介紹轉做文職,連寫個簡單英文電郵都唔識,20歲出頭的阿亮,意識到自己長此下去好大鑊!
「知道自己唔夠料,想讀番書,又唔知讀乜嘢,有個親戚做船長,佢話你咁鍾意海,不如去行船」。離鄉別井,年輕人不願入行,以會考一分成績考入海事訓練學院的阿亮,今次再無半途而廢,而是急起直追。「最初兩年,英文追唔上,好吃力」。對海的渴慕,成為阿亮排除萬難的最大動力,完成三年課程,上年中簽約船公司,正式展開八個月的行船生涯。阿亮形容是自己的全新開始。
「全船22人,只有我同另外一個同學嚟自香港。喺船上,一係講普通話,一係講英文,乜嘢都要靠自己」。首度離家千里,獨個兒面對茫茫大海,以前日日睡到日上三竿的他,一夜間學會獨立,「返到香港,一起身反而唔知做乜嘢好」。船上生活講求紀律,又要輪更工作,晚上望着漆黑大海,只覺渺小,難怪自言看鬼片都唔識驚的阿亮,看到《少年Pi的奇幻漂流》入面的沖天海難,身同感受,急出一身冷汗!

「男人浪漫?係假」

「公海上,見唔到陸地,好似少年Pi,喺船上,我見過滿天飛魚、海豚海獅圍着船邊游水;也遇過巨型大風雪,20分鐘狂吹,然後嘎然而止,人人好似跳緊MJ隻舞,傾斜45度」。但最驚險的,則要數半夜遇上大冰山!「那是午夜,雷達到好近座山時先偵察到,急召船長改航道,打橫行咗兩個半小時先避到,據講係北極大規模溶雪,令到巨大嘅冰山突然喺海面出現,全船人徹夜唔敢瞓,呢啲統統都係難忘嘅回憶」。這些過往只在國際新聞見到的畫面,竟然就在眼前!
壯麗的大自然景觀、四季日與夜的景色變化、不同口岸的異國風情,無不令阿亮大開眼界。「好多人話行船係男人嘅浪漫,統統係假,船上嘅生活其實好枯燥,有時又會好掛住屋企人。但你經歷過呢啲,先會珍惜喺陸地嘅生活,我哋嘅貨櫃船每次一靠岸,所有人都會攞部手機出嚟搵網絡,你會發現好多嘢唔係理所當然。」農曆年後又再起航的阿亮說。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載