› 選擇地區
三藩市
紐約
洛杉磯
其他美國地區
香港 台灣 北美
 
2013年02月27日

隔牆有耳:
區會花460萬公帑 豎旗杆拍馬屁 - 李八方

區議會繼起騎呢雕像後又有新搞作。中西區區議會計劃改造上環西港城附近嘅文化廣場,原本想起個永久嘅表演台,方便舉行社區活動,但建制派議員主意多多,除咗添加天幕同新雕像,仲要豎立12米高嘅國旗旗杆同10米高區旗旗杆,以便7.1回歸同10.1國慶升旗慶祝,埋單計工程費最貴460萬。大嗱嗱四百幾萬擦阿爺鞋?同倒錢落鹹水海有乜嘢分別?

中西區建制派佔多數

中西區區議會建制派佔多,民建聯人多勢眾有成五個代表,據講佢哋仲聯同其他獨立人士及一個自由黨議員齊齊舉腳支持起巨型國旗旗杆,得四個民主黨議員反對建議咋。
反對無效嘅民主黨區議員鄭麗琼話個文化廣場仲好新,沙士後先由市建局牽頭建造,現時豎立喺廣場嘅雕像亦好有歷史意義,象徵沙士期間港人團結精神,但佢話遲啲會起個新嘅雕像。據聞新雕像由幾個立方體構成,似金鋪一格格嘅首飾箱,象徵中西融滙,新雕像落成後舊雕像就要搬去上環海濱長廊。
其實文化廣場聖誕至農曆年間好旺場,每年有十幾個頒獎典禮和活動,鄭麗琼認為建制派堅持起國旗和區旗旗杆,可能係方便舉辦任何活動時都可以升旗奏國歌,硬銷愛國情。該黨另一中西區區議員許智峰感嘆建制派好大喜功,擔心遲啲18區都起國旗旗杆擦阿爺鞋。
查實呢個方案仲未落實,嚟緊4月再開會傾,民主黨表明一定諮詢市民意見,反對建制派亂花公帑嘅市民記住表態。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載