› 選擇地區
三藩市
紐約
洛杉磯
其他美國地區
香港 台灣 北美
 
2013年02月09日

八方人物--Tree根笑看惡搞:
我勇猛時你唔在場

鍾樹根自信因殺傷力強,才招致網民惡搞。
李家皓攝

別人笑我太瘋癲,我笑他人看不穿。人稱Tree根的鍾樹根,卻看得穿他人緣何為他一笑:「可能好多網民重視我,覺得我個人有潛力,知道呢個人不可小覷,所以諗住,睇吓點樣可以阻礙、妨礙我。」Tree根如此解讀針對他的惡搞。從政者的確要帶點阿Q精神。

91年起當選東區區議員的鍾樹根,直至去年循港島區直選晉身立法會才被網民「like爆」,有關其卡片上的英文錯字,以及在facebook錯寫「焚書坑孺」等惡搞圖層出不同,「你哋鍾意笑料,梗係記錄呢啲,冇乜嘢吖……新聞自由嚟㗎嘛,冇問題呀。」
鍾樹根對這些惡搞,似乎看得相當開。甫晉身立法會即鬧笑話,是大打擊嗎?「唔會喎,我只覺得佢哋搵唔到我其他弱點,所以搵啲咁無聊嘅嘢出嚟啫……查實都係好minor嘅mistake啫,冇乜出錯吖,我發現同事甚至媒體都會寫錯字啦」,說完還不忘加一句:「將啲minor嘢重複講,係對我嘅提醒,多謝傳媒對我嘅厚愛。」
口說不介意,鍾樹根心裏還是有些失望──至少他認為,市民看不到他被惡搞外的威猛相。他如數家珍地說曾在不同會議發火,與長毛及張超雄等開戰,可惜「你哋未捕捉到我另一面,我表現勇猛嗰時,你哋又唔在場。」
有言「唔怕生壞命,最怕改壞名」,樹根一名則輕易俘虜不少東區居民歡心,「啲(東區)漁民覺得樹根好親切,我發覺每個灣頭都有好多人叫樹根㗎,有人話我老竇又叫,阿哥又叫,老公又叫,同人距離拉近好多。」

差點成為劉江華二號

年輕時,樹根卻對樹根避之則吉。鍾爸爸當年怕這個貧困家庭下排第十三的孻仔養不大,特別改名樹根,粗生粗養,「我以前讀書,唔鍾意呢個名㗎,成日俾人笑,覺得好老套,所以中學時改咗英文名(Christopher),出嚟做嘢都係用英文名。」
不知是巧合抑或天意,樹根這個名,套在這個「區佬」身上份外貼切,奠定歷屆區選幾乎不敗之身,除卻31歲的一場敗仗。
1988年,鍾樹根首度披甲上陣,在柴灣北挑戰時為反對派的革新會猛將貝納祺,敗選結果當然不意外,參選細節卻耐人尋味,「我當時搵過呂大樂(欲加入匯點),佢問我砌邊個,我話砌貝納祺,可能佢覺得我砌唔到貝納祺,所以唔受我玩。當時冇所謂嘅政治理念,基本個個都左傾,李柱銘、楊森都親中,學聯都係啦。」
匯點其後與港同盟合併,只差一點點,鍾樹根可能是第二個劉江華;93年加入民建聯,事前深思熟慮,「民建聯92年創建時已有人叫我加入,我想觀察吓,一年後發現啲老友、好似王國興都入晒去,我見運作ok,咪決定加入。」

名字草根 生活中產

人到55歲才「升呢」,鍾樹根說沒所謂,最重要有服務機會。入會後最不慣是用上太多時間「拉布」,另一大發現則是長毛原來不外如是:「我以為佢真係好威猛,點知都係鬧嚟鬧去嗰三幅被,𠵱家會由得佢自己鬧,佢都唔係我對手啦,同佢爭論、影低咗我,冇謂啦。」
別看樹根好草根,他的生活其實好中產,經常購買貴價攝影器材。本地劇集非他那杯茶,較愛看國家地理頻道或Discovery Channel,「簡單啲嘛,睇啲海豚走嚟走去,睇一半又得,睇成集又得,relax吓又吸收到知識。」
他看的書,種類繁多,甚至挑戰自我看《易經》,「但係睇極都睇唔明,唔明就問我老婆,我老婆教書,喺中學教中文,梗係問佢啦。」
28歲女兒則是英文教師,「(有冇笑你錯英文?)佢會笑埋一份,但我唔係錯英文噃,係cut and paste錯啫。」
唱歌,則不要預他一份,連他也自嘲「唱歌走音,連咪嘴都錯」,「成個東區都知我唱得好差㗎啦,民建聯籌款晚會要新丁唱歌,我咪濫竽充數囉。」

唔會靠搞旅行搵選票

「我爭取支持,唔係靠唱歌㗎喎。」同樣,他說非依靠蛇齋餅糭搶位,「我真係搞好少,但年尾派花、月餅,我都有做,旅行真係十幾年冇搞。」
不搞旅行原來是為免得不償失。「搞旅行其實好蠢,參加嘅人實會話你:有冇搞錯呀,部車咁硬㗎,啲位唔好坐,冇冷氣,連個位都會爭一輪,我都費時理佢哋,搞嚟做乜?
如果諗住搵選票,永遠搵唔到,反正街坊邊到有着數都會去,呢個係人之常情。」
記者 許偉賢

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載