› 選擇地區
三藩市
紐約
洛杉磯
其他美國地區
香港 台灣 北美
 
2013年02月02日

隔牆有耳:
鄭家富之矛 
對付官才是上策

鄭家富不贊成市民透過光復行動跟水貨客糾纏,認為成效不大。 羅君豪攝

【隔牆對論】雙非人、自由行在香港觸發床位荒、學位荒、舖位荒、住屋荒……搶奶粉令中港矛盾再次升溫,香港城邦論「教主」陳雲日前因這議題與鄭家富在烽煙節目炒大鑊,怒cut電話離場。
隔牆再論,陳雲狠批澳門的本地人優先登記做法是「配給制」,「唔通第日買衞生巾都要配給呀?」鄭家富則指現在是官逼民反,矛頭應直指官員才是上策,目前「人鬥人、民反民」的「光復行動」,只是重演文化大革命。但兩人一樣怕了自由行,而要避走鬧市。
記者:雷子樂、姚國雄

相關新聞:隔牆有耳:陳雲的盾 護自身利益為重

記:《蘋果》記者 鄭:鄭家富
水貨客令民怨沸騰,政務司長林鄭月娥組成跨部門小組處理,入境處、警務處及勞工處多次採取「風沙行動」,拘捕多名水貨客。但做騷過後,問題依舊。

記:香港人曾向政府示威、循正式途徑投訴水貨客破壞環境,但都沒成效,才有激烈行動,你不同情他們嗎?
鄭:我當然同情。我尊重佢哋,唔代表我同意佢哋。呢啲叫官逼民反,既然係官逼你,應該對番官。唔係官逼你,就變咗「民反民」。因為政策令到啲人(水貨客)走緊呢啲罅隙,佢哋冇犯法。
呢班人部份係內地父母,唔係水貨客,只係因為共產政權嘅不堪,導致佢哋唔相信內地嘅奶粉。佢哋都係中國人,我諗起就難受。中國人點解要咁樣對中國人呢?真係悲從中來。如果(反水貨客)用同樣嘅激情去圍高永文,我拍手掌,我隨時加入埋一份㖭。

記:如何解決港人買不到奶粉、水貨客猖獗的問題?
鄭:例如憑出世紙,港人喺母嬰健康院可以即刻買到,你買幾多都得。我強調呢個唔係「配給」,而係父母攞住出世紙證明個BB喺香港出世,就可以去到母嬰健康院或社企買到林林總總嘅奶粉,唔會俾水貨客買到。我支持將奶粉納為儲備商品,限制出口數量。
但整體嘅水貨客問題一定要靠梁振英同內地政府傾,香港當然可以用儲備商品條例(限制奶粉出口),但唔可以益力多又係、維他檸檬茶又係,紙尿片又係(儲備商品),唔得㗎!香港係一個自由港口,係好緊要,香港點解喺六、七十年代(經濟)起飛?點解咁多外資鍾意香港?就係因為香港係一個自由港,所以要保護,不應破壞。

自去年圍堵D&G後,中港矛盾今年因搶奶粉事件再推向高峯。光復行動有趨向激進的迹象,輿論也批評「辱罵、滋擾內地旅客要不得」。

記:你如何評價這些光復香港行動?他們這樣做有成效嗎?
鄭:嗰次行動係有危險,我擔心會初則口角,繼而動武,對方會覺得你唔係執法者,有乜權可以周街度我件行李。你度得幾多個呢?你度得一個站時,第二個車站仲有一大批。
香港仲剩番乜呢?就係法治。例如食肆未禁煙時,二手煙好嚴重、死好多人,咁你會唔會走去圍住食煙嘅人、拎咗人哋支煙、叫佢哋以後唔再嚟呢間茶餐廳呢?唔係咁㗎嘛,我哋最多係死忍爛忍。
當有啲不良行為未去到非法,焦點應該係向政府提交建議。政府有公權力應該要做嘢,政府仲唔做嘢,我就圍你(政府),但就唔係自己去執法。搶咗食煙嘅人嗰支煙,餐廳老闆都未做,做客人都唔可以啦。如果係單純用人(市民)去做一個判斷係相當危險,即係走向文化大革命、人鬥人。

銅鑼灣區舖租為全球最高,去年呎租約1,700元,取代美國紐約第五大道,成為全球最貴舖租地段。油尖旺、灣仔、各區商場充斥金舖、名店、藥房「為人民幣服務」……

記:你有冇受到自由行的影響?你有多久冇去過沙田新城市廣場、旺角?
鄭:我間婚禮公司喺廣東道,由公司一落嚟,我都試過俾自由行啲篋嘅轆轆過隻腳無數次。我覺得內地自由行人數要檢討。內地13億人口,1億人嚟香港,香港都陸沉啦。𠵱家唔止廣東道,連西貢、清水灣嘅郊野地方都俾自由行搭晒營。零售業當然開心,但自由行影響到香港人嘅生活,搶貴晒租金,係得不償失。
我好耐冇去過新城市廣場,冇需要我都唔去大型商場,我寧願去內地自由行好少去嘅地方,例如舊屋邨,去士多買嘢,去懷舊,例如彩雲邨。香港人要逃避內地遊客,因為佢哋太嘈、太多行李篋嘅轆。不過我相信梁振英係唔夠膽得罪內地,唔夠膽主動提出呢啲問題。

記:如何看未來的內地自由行與港人矛盾?
鄭:錯嘅唔係人民,矛頭應該指向個政府。兩地政府有冇為香港人、大陸同胞着想?人與人之間需要包容,畢竟佢哋都係中國人,有時真係好唔開心,見到內地自由行周地屙尿屙屎、周街丟垃圾、吐痰、冇禮貌、搶位、打尖,惟有用我哋嘅禮貌,提番佢唔好打尖,香港呢度係要排隊。

記:有冇諗過陳雲會cut你線?
鄭:我已經唔係用問劉慧卿嘅語氣問佢,我諗最觸動佢嘅,係我叫佢同城邦自治運動嘅成員進一言。我估唔到佢會咁唔開心收線。陳雲作為教授同學者,我平情講出我嘅想法,我嘅聲線、聲浪、用詞,係相當客氣,但佢一句話以後唔接受我訪問(便收線),呢一種不歡而散,我唔係好想。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載