› 選擇地區
三藩市
紐約
洛杉磯
其他美國地區
香港 台灣 北美
 
2013年01月28日

隔牆有耳:
蔡伯勵女兒批算:狼英大運已過 - 李八方

中國人最棹忌係腳頭唔好。去年7.1狼振英上場後,政治爭拗不斷,民生又冇改善,最近仲要俾Dream bear踢爆僭建又講大話。有份編纂通勝嘅廣東真步堂第四代傳人蔡興華爆料話,CY十年大運早已行完,𠵱家呢10年只係名大於利,仲有排辛苦,「辛苦在於人哋唔支持你」。

與父唱反調

廣東真步堂有120年歷史,蔡興華師承父親蔡伯勵,噚日佢喺香港文化博物館講解通勝,吸引近400名市民捧場。雖然蔡伯勵早前指,屬馬嘅CY蛇年有吉星「太陽正照,晦氣全消」,但蔡興華同八方講,狼英10年大運已過,即使上任特首都唔係好得人支持,「支持你嘅時候又唔得力,冇乜人再得力支持到你,即搵唔到最好拍檔」。
蔡興華話蛇年香港運程開始好轉,但只係轉捩點,馬年先會明顯復蘇。佢又話,蛇年立冬後一個月係「歲破月」(相沖月),即西曆11月7日到12月7日,呢段期間內有損耗,外有波動,投資不宜太進取。
蔡興華解釋,立冬日適逢癸巳年、癸亥月、丁丑日、丁未時,「巳」和「亥」相沖,「假定『年』係最高領導人,年同月沖,即佢下面近身同自己都唔咬弦」。「丑」和「未」又相沖,即上下不和,好比市民同政府,「即係我哋有理想,遊行去表達訊息,但另一度又唔附和你,即係有斷折,上下間唔得一致」。
八方好記得,鄉議局主席劉皇發喺龍年年初二到車公廟求得一支中籤,首兩句為「何為邪鬼何為神 神鬼如何兩不分」;斷曰「忠奸不分 顛善倒惡 愛出風頭 非改不可」。
𠵱家到年尾回顧睇番都幾靈,邊個係神邊個係鬼,到𠵱家香港人都搞唔清。一句到尾,小圈子選舉,搞到香港烏煙瘴氣。

mailto:pf_lee@appledaily.com

歲破月(相沖月)
日期:2013年11月7日(立冬)至12月7日
解讀:立冬之時辰適逢是癸巳年、癸亥月、丁丑日、丁未時;巳與亥和丑與未均相沖,即有損耗
注意事項:容易有爭拗、衝突和意氣之爭,運程較反覆
投資方面有大波幅,不宜太進取
忌:大事勿用,如結婚、公司開幕、動土建築
宜:宜靜不宜動
資料來源:蔡興華

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載