蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年01月26日
馬上成為壹會員

八方人物:
惡搞詞人梁栢堅:香港需要幽默

當民建聯元秋蔣麗芸高喊:「男人忙到可以忘記結婚紀念日」,梁栢堅即拍枱:「你夠膽咁講,我梗係夠膽玩你啦!」結果譚詠麟經典金曲《愛在深秋》,變成網民熱傳的《愛在元秋》。事情太膠,令梁栢堅不得不惡搞歌詞,替全民消消氣,他的惡搞卻不帶仇恨,只希望自己的超低能,市民會覺得勁搞笑。

由富士康事件說起

梁栢堅的日與夜,相當不同。穿套西裝返銀行工是日間,惡搞歌詞上微博是夜晚。因為熟讀民建聯的嚇人新聞,36歲的梁栢堅很能惡搞出「精髓」。別以為《愛在元秋》已經夠「抵死」,更「啜核」的還在後頭。
民建聯下月的「點止蛇齋餅糭咁簡單」自嘲年宵,正常人「睇到眼都凸埋」,激發梁栢堅再執筆,找來謝霆鋒的《活着VIVA》,為厚顏的民建聯搖滾一番:「年宵攤有陣除,賣埋蛇齋餅糭得佢,貢埋去,個個拍埋六呀七八十歲……」
「攞蛇齋餅糭嚟自嘲,其實佢哋係高章咗:與其俾人講足十年,不如自己話自己係。呢招係自稱『大滾友』,就冇人會話你係嫖客吖嘛。」劉夢熊大爆料狠批梁振英,梁栢堅昨天把《夢醒時分》惡搞成《熊劉夢醒時分》,兩首新詞還未「派台」,還看梁的微博何時發佈。
第一次惡搞,已經是2010年的事。當年血汗工廠富士康接連有員工因工作壓力跳樓,梁借用陳奕迅《富士山下》,以《富士康下》大控訴:「誰都只得那雙手,要工作入場就戴手扣,你一到工廠開工已經折壽。」。梁栢堅嘆指:「惡搞呢首歌時已經係第15、16(人)跳(樓),好奇怪嘅一間公司,死完一個又一個。」
梁的父母更感奇怪,因《富士康下》上了微博,變了新聞,梁父梁母在內地新聞聽到「梁栢堅」:「佢哋嚇咗一跳,喺新聞聽過我個名,我開始覺得惡搞好玩。」法官包致金姪女Amina掌摑交警獲輕判,梁便將《可惜我是水瓶座》惡搞成《可惜我是金牛座》:「你若鋤佢,要睇邊個姪女,尤其明知金牛座判決是無罪。」

讀書時惡搞主禱文

梁栢堅讀書時惡搞主禱文,明白惡搞令人銘記,也令人發笑,更是當下最好的嬉笑怒罵。他說,上世紀沒惡搞,只因許冠傑憑歌寄意,新世紀歌星鍾情歌頌愛情,「當年制水、民生、加價,個個識得唱,好多年冇呢啲歌啦!」
他將惡搞歌詞比喻為塗鴉:「做完出嚟大家有得笑吓,未必一定見報,但原來大家一樣咁諗、有共鳴,大家諗嘅嘢其實一樣,只係冇渠道去笑,香港就係需要呢樣幽默……我冇乜仇恨,我自己寫,自己喺度笑,好低能。」
惡搞無償,正式填詞才有價。07年開始填詞的梁栢堅說:「點解我填正式嘅詞冇乜人留意?」有,有很多人留意,無綫熱播電視劇《老表,你好嘢!》,主題曲《大家》便是梁栢堅作品。
記者:姚國雄

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載