蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年01月24日

爽人物:不捧熱刺捧傑志
港隊Fans血仍未冷

馮肇文(Edmund),港足打氣團「香港力量」(The Power Of Hong Kong)成員,本地足球死硬粉絲,奉行「不捧熱刺捧傑志,不撐英格蘭撐香港隊」信念,不單自掏腰包隨港隊南征北伐,上月還與朋友自資出版打氣刊物《大球場道》免費派街坊,稱要在港推動「入場就郁」的足球打氣文化。記者:呂麗嬋

漫畫《男兒當入樽》裏有這樣一幕:湘北隊歷盡艱辛才能打入全國大賽,可惜在第二圈就遇上候補冠軍,球隊在比賽中段大比數落後,正當後備席人人意志消沉,「四眼哥哥」木暮說:「球員在比賽中還拼命作戰,我們代替不了他們,至少給予他們勇氣吧。」打氣,就是這樣一回事。24歲的熱血Edmund,深信不疑。
「愛上香港足球始於12年前,嗰時我讀中一。我記得第一場現場睇嘅比賽係愉園對快譯通,全場吶喊,氣氛好好,自此愛上。2005年我已同志同道合朋友隨港隊四出觀戰,基本上球隊廣東省作客我都會去,最遠跟去日本同高雄,唔想球員孤軍作戰」。做船務工作的Edmund,大部份假期都花在「打氣」上。
省港盃上月在惠州舉行首輪賽事,他們一行30幾人,就自備樂器、旗幟,即日來回六小時車程,「當地吹雞市內3,000小學生做球迷,我哋被主場球迷打氣聲包圍,雖然勢孤力弱,但當我哋大叫We are Hong Kong,當地球迷都報以熱烈掌聲,以示鼓勵」。
訪問當天,Edmund就一身打氣戰衣。港隊球衣、區旗作斗篷,再配上紅色波鞋,由頭紅到落腳:「我哋係球隊嘅第12人,仲記得三年前嘅東亞運嗎?全個大球場都在喊:『We are Hong Kong!』置身其中,真的感受到香港力量,好感動,尤其喺自己地方傳遞區旗,最後更創下奇蹟,一舉摘下金牌,無需語言,已是最好嘅身份認同,根本毋需甚麼國民教育!」

大家出一分力可改變

只是香港球迷現實,成績與入場人數掛勾;縱是香港隊主場,觀眾很多時都會支持較有名氣的外隊,像Edmund的死硬港隊粉絲確實罕有,「有成員就講笑,話今時今日同人講鐘意睇香港足球,仲慘過出櫃,乜仲有人睇香港波㗎?已經係最客氣嘅質詢!」記者周日下午隨他觀看本地聯賽傑志對橫濱FC(香港),可容納5,000座位的將軍澳球場,坐了不足2、300人。球場空蕩蕩,猶如閉門作賽。
「好想鼓動更多人入場,大家都出一分力,就可以改變」。儼如愚公移山,別的球迷每逢周六、日安坐家中追捧曼聯和車路士,本身是傑志球迷的他,就買下聯賽季票,一個月總有兩、三日入場觀戰,以示支持。又與一班有心的本地球迷,成立打氣團「香港力量」,鼓勵十支甲組球隊的球迷打破門戶之見,團結一致支持香港隊。「唔努力走出第一步,你永遠唔會知結果會點」。「下月大年初一有賀歲波,3月22日亞州杯,香港會主場對越南,很希望有更多人加入我哋行列,為呢個城市、為香港足球加油」Edmund說。
(香港力量面書網址: http://www.facebook.com/thepowerofhk )

港球場設禁鼓令 阻礙打氣文化

很多球迷都夢想到歐洲睇波,嚮往當地熱烈的現場氣氛,但在香港,莫講放煙花,站立、打鼓,隨時被炮轟為擾民。Edmund表示,所有帶進球場的打氣用具,包括樂器和旗幟,都得預先申請及接受審批,如將軍澳、小西灣等FIFA標準球場,更設「禁鼓令」,就是中午作賽,也嚴禁打鼓發聲浪。
「冇運動場規例寫明唔可以打鼓,只係呢幾個球場每次申請都唔批。曾去信康文署,署方回覆話噪音太大,但呢啲都係標準球場,理應做過環評,況且只是中午3、4點,一個鼓點解都唔得?」上月港隊對朝鮮的賽事中,打氣團就高舉「LOVE HONG KONG,HATE LCSD」抗議標語以示不滿,「希望有關方面放下官僚作風,我哋入場只為支持愛隊,安靜睇波,咁不如去圖書館!」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載