› 選擇地區
三藩市
紐約
洛杉磯
其他美國地區
香港 台灣 北美
 
2013年01月19日

隔牆有耳:
雙對論變我主場 
劉細良:梁班子「流」到冇朋友

劉細良指民意戰重質不重量,最重要是觀察不同議題,讓政府高層考慮。馬泉崇攝

【隔牆對論】

施政報告獻世出爐,猶如賤男擁着小三卻大聲疾呼無意離婚,再意亂情迷、有眼無珠的癡女都應該清醒,更何況香港人是如此現實──僭建可以忍,政治分贓可以忍,即使講大話也可以忍,惟獨對「無能」忍無可忍。在曾蔭權時代任中策組全職顧問、主力撰寫施政報告的劉細良狠批,梁振英開空頭支票,重用無能「梁粉」,與政務官團隊決裂,施政之路將如無間地獄,慘烈無比。

記者:張嘉雯

相關新聞:隔牆有耳:沉默地打輿論戰的梁粉們

劉細良在「拖」政報告發表那天,並沒有閒下來,整天在網上點評CY「藍圖」,其中一個罪名,是梁振英成立眾多委員會架床叠屋、安插梁粉,加劇與政務官之間的矛盾。
大話英只顧開委員會遮醜,忘了一個月前中策組全職顧問高靜芝才被嘲為太監李蓮英,全身中箭。

「你知唔知到𠵱家為止最多人投訴嘅電視節目係咩?係欣宜咀吳卓羲嗰幕呀,有成六萬幾人投訴,香港人嘅心態好得意,佢哋投訴唔係因為欣宜嘅外形,而係認為佢咀人呢樣嘢唔係佢應得嘅,係因為佢阿媽(沈殿霞)嘅人際關係。」
他形容高靜芝的處境和欣宜相似,「高靜芝做婦女事務委員會,好多人同佢合作過,呢個人嘅能力去到邊,大家心中有數,知佢幾多斤兩,公務員千辛萬苦考入去做AO(政務官),個個係香港尖子,你一個咁嘅高靜芝想攞我個權?」

「公務員係一個有性格嘅機械人嚟,你鬧個機器人抵制你,其實係你揸佢唔郁」

他認為,公務員之所以不滿梁粉,並非政治信念之爭,而是看不起低水平「業餘政客」,「政務官心裏面蔑視緊呢班政治新貴,『你憑甚麼?』個個講到天下無敵,但到頭來做唔到,好多方法其實啲政務官係諗過晒。」
「公務員係一個有性格嘅機械人嚟,你鬧個機器人抵制你,其實係你揸佢唔郁,要揸得郁佢,一係你有一百萬票,有民意授權,咁咪壓服我囉,或者你本身好叻,啲政策諗到好通。」但CY兩者俱缺,以為委任親信就可以成事,是愚蠢「知客」的行為,「香港人飲茶攞飛排隊,最憎人打尖,但有啲熟客過時過節畀利是,如果個知客係醒嘅,會靜靜雞幫啲熟客攞枱,唔會畀其他排緊隊嘅人知,唔會發個電郵,用特首名義出,話畀人聽邊個邊個可以打尖咁蠢,你做到浮晒面,其他茶客咪起哄鬧你囉」。
「你睇吓環境局,墮落到要搵黃錦星嘅地步,稍為認識政府架構都知道,黃錦星根本係連委員會成員嘅級數都不如,口碑是否足以令政務官服?佢點command(命令)到政務官?」政務官不甘業餘政客打尖爬頭,兩者鬥爭沒完沒了,「如果係由政務司司長辦公室coordinate(統籌)委員會任命,講清楚個準則,就唔會咁大反彈啦,香港人始終信公務員多啲,政務官會佔上風。」
他認為問題癥結,在於梁班子「冇朋友」,無法吸納優秀人才,「以前政府有晒自己alliance(盟友),唔同嘅嘢推出嚟,自然會有王于漸、鄭宇碩嗰啲去頂,呢啲人唔使畀錢去買,唔使話攞番2,000萬撥款番嚟養啲學術五毛」。
劉細良舉了國民教育最終由胡紅玉「收科」為例,反證梁粉不但力有不逮,而且靠不住,「政府用咁多錢養埋咁多做青年事務嘅建制派人士,爆咗鑊有冇一個人可以出嚟頂,最終咪又係胡紅玉,咪又係民主派背景」。他批評梁粉根本「唔入流」,「所謂栽種梁粉,係咪真係可以幫到你呢?有起事上嚟你靠佢?佢靠番你呀,首先佢可能第一個撇啦;第二,佢出嚟隨時幫倒忙,你𠵱家已經見到晒啦,最終承受嘅都係政府」。
他認為現時政府選擇的路線,是令所有人「speak the same language」(統一觀點),各委員會淪為政治分餅仔,不再是聽取意見的場所,他回顧自己參與中策組的年代,認為現時整個組織已經變質。
劉細良憶述,在顧汝德當首席顧問時,他是神秘小組的成員之一,「入面有建制派嘅頭面人物、民主派中堅,羅祥國、李卓人、何喜華、陳婉嫻、戴希立、梁錦松,乜人都有,冇一個人叫做『港督粉』,傾政改、傾重大社會政策,包括老人金、福利開支,目的就係要聽唔同人嘅意見,唔係要please(取悅)政府。」

「如果淨係搵建制派嘅人,冇咗嗰種客觀評估,聽意見係變咗質」

當時顧汝德不會直接與他們接觸,「當時我以為因為我係𡃁仔,所以唔見我,到後來入咗政府做,先知佢好有智慧,佢係唔想畀意見嘅人覺得自己serve(服務)緊港英政府,唔想令嗰啲人表達意見有偏頗,要將你覺得最好嘅資訊話畀佢聽,協助佢做決定,真係要攞個社會脈搏,如果淨係聽埋一班港督粉絲、擦鞋仔講,政策出嚟同民情好大落差咪死梗囉。」
他指現在全職顧問多,非全職顧問也會印卡片,眾人當中策組是政治事業上的踏腳石,「可想而知佢會同你講啲乜嘢呢?佢嚟開會嘅motivation(動機)係乜嘢呢?係咪真係幫到政府政策?如果佢只係志在印張卡片返大陸walk嘅,咁就大鑊㗎喇喎,如果淨係搵建制派嘅人,冇咗嗰種客觀評估,聽意見係變咗質。」
現時的中策組被視為「party organ」(喉舌),在香港卻顯得不倫不類,「外國行政黨政治,親政府嘅智庫出謀獻策,係由黨出錢,唔係用公帑,但係喺香港呢套咁唔清唔楚嘅體制,特首唔可以有政黨背景,唔可以調動政黨嘅資源,於是將中策組變咗自己智庫,僭建啲邵善波、高靜芝出嚟去負擔呢個功能,結果就被議員質疑濫用公帑囉。」
對於早前中策組首席顧問邵善波發表要打網上輿論戰豪言,劉細良形容猶如電影《國產凌凌漆》中,聞西手中集合西瓜刀、單車鏈、火藥、硫酸、毒藥、手槍、手榴彈、三角銼於一身的超級武器「攞你命3000」一樣,純粹得啖笑,「out(過時)得好緊要,好似停留咗喺未online(有網絡)嘅時代,搵兩個人mon(監視)住discussion forum(網上討論區),咁咪即係聞西咁囉,望住個網做乜嘢呀大佬?一條片upload(上載)上去,半個鐘頭就散開晒啦,高登有、baby kingdom有,搵兩個聞西坐喺度就可以打輿論戰?聽到都覺得搞鬼啦。」
他指民意戰重質不重量,最重要是觀察不同議題,讓政府高層考慮,「陳茂波都講啦,要爭奪話語權吖嘛,話語權唔係講個量,好似新界東北、雙非問題咁,係講個論述,論據贏佢吖嘛,如果佢有睇獨媒,講粉嶺收地、囤地,都唔知寫咗幾耐啦,你寫句嘢上去,一定俾人打到一面屁,你有越多五毛,佢就越多人上嚟同你打。」
劉細良認為,梁班子「冇朋友」的問題不會解決,施政困難重重,與所謂輿論戰無關,「呢一仗戰場廣闊,同董建華年代比會慘烈好多,周圍都有火頭,好似無間地獄咁,沒完沒了」。

齊心一意,打救行騙長官梁振英
http://www.tomonews.net/game/bslapcy/web/

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載