蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年12月31日

隔牆有耳:
「港女500」擺午餐婚宴喊住認錯 - 李八方

幾個月前,一位準新娘因為喺facebook講咗句「$500人情就不要來」,被封為「港女500」兼引起網上熱烈討論,俾網民起底同公審。一輪風雨過後,女主角噚日正式係黃埔海逸君綽酒店擺午餐婚宴,據聞仲喊住認錯﹗

僅一名網民踩場

呢次婚禮俾網民譽為「世紀婚禮」,仲有人大大聲聲話要踩場示威。八方同一班行家噚日都有到場睇吓,點知網民得把口,成場都冇人「尋釁滋事」。但呢個世界總有勇士,一位家住屯門、今年讀中四嘅網民潘同學,雖然自稱唔係高登巴打,但見到有網上群組話要踩場,都特登搭車出嚟見識吓。
呢位潘同學雖然孤身走我路,但佢一啲都唔怕,多番走上走落想睇吓個婚宴搞成點。佢覺得女主角當初講嘅嘢好唔啱,但覺得貪心係人嘅天性,有咁嘅諗法都無可厚非。佢自稱件事對自己有好大影響,「以後見到紅色炸彈都唔敢接,唔敢去飲。」潘同學又話,今次事件「啟發」佢日後結婚都唔會擺酒。
其實你我身邊總有高登人,婚宴舉行期間已經見到有巴打上載「獨家」圖片,更有人影咗張新娘相上載高登。講番今次事件嘅女主角,今次擺咗18圍。有啲賓客講,新娘喺席間曾經講過之前曾經做錯事,希望大家可以原諒云云,講到眼濕濕。不過有賓客知道佢真正身份後,講咗句:「畀咗$500㖭」。
點都好,八方希望事件可以告一段落,始終佢哋唔係乜嘢公眾人物,各位巴打絲打放佢哋一條生路啦。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載