› 選擇地區
三藩市
紐約
洛杉磯
其他美國地區
香港 台灣 北美
 
2012年12月26日

隔牆有耳:
挺梁請臨記 人工大縮水 - 李八方

狼振英呃咗個特首番嚟做,唔經唔覺已半年,嚟緊嘅元旦多個團體發起遊行要佢下台。有「挺梁」嘅紅色組織就搞遊行撐CY,有幾多人出席就未知,但噚日網上就瘋傳有人用200蚊請老臨去撐CY嘅短訊對話圖片。咦,手法咪同今年中禮義廉用錢請臨記去反拉布一樣?

網上瘋傳短訊圖片

瘋傳嘅短訊圖片有兩組,一組係有市民邀請朋友元旦去灣仔撐狼英,有200蚊,被邀者追問係邊個組織請人,對方就話唔知。
另一組圖片係有人透過短訊向朋友訴苦,話本來買晒機票出trip,但突然收到電話要去元旦遊行「被迫撐梁」,搞到要取消行程,又呻「我一日做呢行,我就要撐政府」、「所以我有生意」,仲話因為太急,所以老臨「人工雙計」。八方就八到,原來呢位仁兄打工嘅公司同一間中資機構有生意往來,所以為保生意,冇得推。
估唔到狼英喺施政報告前搶閘推出呢個200蚊計劃,有唔少高登仔就大鬧200蚊就想收買人心,真係「香港梁心」;亦有高登仔呻窮,話一於去拎完200蚊就即刻去參加倒梁遊行。
有份喺元旦搞遊行撐狼英嘅團體包括愛港之聲同香港各界慶典委員會。睇真啲,用錢請人示威遊行呢啲手段似曾相識。

禮義廉請人反拉布

半年前立會審議替補惡法,人民力量拉布,八方同事就喺立法會外混入反拉布嘅示威者當中,踢爆原來大部份都係禮義廉用300蚊請番嚟嘅臨記,仲直擊埋收工出糧嘅過程㖭。但係反拉布有三嚿水,撐狼英就得嗰二百蚊,究竟係老臨人工貶值,定係撐狼英,唔值得畀太多錢呢?
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載