› 選擇地區
三藩市
紐約
洛杉磯
其他美國地區
香港 台灣 北美
 
2012年12月21日

隔牆有耳:
神父也反狼 - 李八方

狼振英喺僭建醜聞上猛講大話,已經俾泛民同市民追住嚟打;點知連民生政策,佢亦一樣搞到亂晒大龍,周圍得罪人。好似之前政府突然間放風,話要將啟德體育城塊地起樓喎,當時已經搞到體育界揚言上街抗議,最近更加辣㷫埋一班原本與世無爭嘅神父,唔排除出嚟同狼英撐到底!

無故更改地皮用途

事緣政府早排失驚無神放風,話要將粉嶺皇后山嗰塊原本要起私立大學嘅地改為起樓。八方聽聞,呢個諗法係狼英同劏房波關埋門度出嚟,政府內部根本冇詳細傾過;但唔知點解,之後又有人急不及待拋出嚟試水溫囉!不過最大問題係,政府之前已經收晒辦學團體嘅意向書,家忽然轉軚話唔搞,有份參與嘅辦學團體,真係俾佢玩死!
八方聽聞最㷫嘅辦學團體係耶穌會。耶穌會係香港其中一個最大教會辦學團體,校友遍佈政商界。據知一班有心有力又有錢嘅校友,早已同耶穌會神父成立委員會,為申辦私立大學做好前期準備;家下狼英忽然想叫停,班神父唔火滾先至奇!

耶穌會校友多猛人

日前耶穌會神父更約見立法會議員,希望議員睇實狼英,唔好畀佢隨意推翻私立大學計劃。本身係華仁仔嘅莫乃光同八方講,其實班神父好公道,只係想政府唔好講過唔算數,唔好未經諮詢就獨斷獨行改政策,覺得咁樣唔止對耶穌會唔公平,對其他入咗意向書嘅團體都好唔公平!
雖然班神父暫未透露下一步行動,想睇埋政府有乜回應先,但有政界人士同八方講,唔少耶穌會校友均非等閒之輩,喺中港兩地全部有頭有面;狼英若然辣㷫佢哋,怕且相當麻煩!

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載