蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年12月14日

隔牆有耳:
湯大狀娶新抱 老友冇甩底 - 李八方

囝囝煒軒同女友拉埋天窗,榮升老爺嘅湯大狀同湯太都好激動。方智傑攝

法律界猛人噚日雲集尖沙嘴洲際酒店,齊齊賀資深大律師湯家驊娶新抱做老爺。原來呢位新老爺噚日朝早起身一直心慌慌,勢估唔到佢老友、律政司司長袁國強送咁「厚禮」,爆出建議終院提請釋法,萬一啲法律界貴賓因此缺席咪大鑊?最終李國能、黃仁龍同馬道立等都有到賀,冇因此甩底,先令湯大狀放下心頭大石。

噚日嘅婚禮場地,儼如記者會扑咪大會,唔少記者喺場外等住問吓能官同黃仁龍等點睇再釋法?湯大狀辦喜事,冇理由搶風頭嘅,所以佢哋一概笑住唔回應。雖然湯大狀都反對律政司霸王硬上弓,但袁國強繼續赴會,只談風月、不談政事,席間仲同喺釋法問題上同佢唱反調嘅張達明言笑甚歡,搞到大班都忍唔住話:「乜你哋仲有偈傾咩?」現場所見能官摸住酒杯底周圍同人傾偈;張大姐、陳太同葉太就着到靚一靚去飲。

偕親家合唱助興

噚晚婚宴筵開67席,湯大狀獨子煒軒Justin係見習大狀,唔講唔知,原來佢老婆陳宛莛Mandy係「港版PSY」錢國偉女友陳宛蔚嘅妹妹,所以錢國偉噚晚都有去飲。夾開band嘅湯大狀就同親家老爺合唱一首英文歌助興,演出獲全場賓客熱烈鼓掌。
湯大狀眼見阿仔成家立室,都有啲激動,希望阿仔同新抱仔互相尊重、恩恩愛愛。八方建議新人年年結婚紀念日都擺十圍八圍,等老父湯大狀名正言順上台唱歌,過吓表演癮,咁就最孝心嘞。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載