蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年11月28日

阿涂:逆向歧視絕對存在

身為基督徒的涂謹申坦言自己不能接受同性戀。司徒世華攝

民主黨涂謹申向來關注人權事務,但說到就性傾向歧視立法進行諮詢,他在議會內卻投下了棄權票。是否支持同志平權,他內心「十五十六」,「如果小巴司機拒載同志,係唔應該,要受法律保護;但如果我唔鍾意請同志傭工,係咪要告到我坐監先?」他認為一旦立法,逆向歧視「絕對存在」,必會有同志向教會、教徒議員、公司東主「挑機」。
本月初的同志平權議案,民主黨有五票支持,惟獨基督徒涂申謹投下棄權票。本身是律師的他,以大量例子解釋自己的投票決定。

相關新聞:葉劉:同志員工細心溫柔

不想小孩接觸同志

他舉例說,若酒店不租宴會廳予同志舉行宴會、小巴司機拒載同志,他認為應有法律保護。但若業主不想租樓予同志情侶,或像他這個愛兒心切的爸爸,不願聘請一個同志家傭,確有性傾向歧視之嫌,但他不贊成要立法禁止。
「我接受唔到同性戀,我請家傭,唔想我小朋友接觸呢樣嘢。我要佢一齊住,我冇法接受,我唔想照顧我小朋友嗰位姐姐接觸佢最多,我唔想佢做我家傭、補習老師,咁係咪要我坐監?」涂謹申不接受與同性戀者有太親密的接觸,跟信仰有關,「我係基督徒,我信天父希望我哋按聖經真理去做;我唔覺得我會教一個小朋友去接觸呢樣嘢」。

憂會令教科書改寫

與不少基督徒團體一樣,他擔心一旦立法,同志團體下一步會要求承認結婚、承繼財產權利,教科書內容也或會因而要改寫,「課本上爸爸媽媽很愛我,喺咪要改為家長很愛我?如果唔係,會唔會俾人話歧視爸爸爸爸很愛我嘅家庭?」
明光社一直以逆向歧視做反對立法的擋箭牌,涂謹申認同說:「係有嘅!係有、係有、係有!例如工作上,若我唔喜歡同同志共事,咁已經會有問題」。哪為何現有四條反歧視條例,都未見有出現逆向歧視?他的解釋是,性別平等、種族、傷健、家庭崗位等平權,已是普世價值,但同性戀現仍未是主流價值,「所以大家唔願當呢個係歧視」。
他甚至指,外國曾有例子,一些爭取權益的人,用法例去令其他人屈服。「個運動係咁去,如果我係基督徒議員,你係同志,我請人,你故意走去應徵,我唔請,咪告囉!」

相關新聞:同志公務員多受保護

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載