› 選擇地區
三藩市
紐約
洛杉磯
其他美國地區
香港 台灣 北美
 
2012年11月26日

隔牆有耳:
唐唐核心論 狂賀新人 - 李八方

唐唐用佢嘅「核心價值」論祝賀一對新人,贏得全場掌聲。影片畫面

真係要講多聲恭喜!八方版主許偉賢同TVB新聞王子林子豪拉埋天窗,前晚筵開50席,八方好多同事,仲有好多政界人士,都有去飲番杯賀一賀佢哋。呀林太向來都好開心、好鍾意笑,估唔到呢對新人擺酒,都有好多笑料,包括去錯咗地方註冊、結婚蛋糕竟然係隻「乳豬」;最爆係請到唐唐出面為佢哋拍祝賀短片,大爆「結婚係人生核心價值」等金句,笑爆全場!

祝賀短片大爆金句

真係未試過出席一場咁爆嘅婚禮,爆到擺足近50圍,逼爆酒家、爆到搵咗長毛、曾鈺成、詹培忠、梁福元、唐唐等人大爆金句祝賀,可見呢對跑開政治beat嘅新人有幾交遊廣闊。一對新人首先跳番part舞出場;喺台上一般係有切蛋糕儀式,但林氏夫婦就一反傳統,改為拎起菜刀手起刀落切乳豬形蛋糕。
祝賀新人嘅短片就更加精采。葉劉淑儀喺鏡頭前就引用自己金句話「放長雙眼睇佢哋早生貴子」。但講到金句,就點都唔及唐英年勁。佢話,子豪追咗許小姐六年,「吊吊揈六年,結完婚就要定定性性」,唔可以用「語言偽術」;仲話結婚係人生中一個核心價值,「呢個核心價值亦係婚姻嘅核心價值」,要維持,就必須要有一個好強烈嘅核心價值!

仲有長毛出鏡話,子豪同偉賢兩個都係好人嚟,「好人加好人,正正冇理由得負?正正得正啦。」同事後來八到,原來喺拍片之前,長毛飲咗少少酒;詹培忠就語帶雙關,叫子豪唔好學其他人有任何「缺失」,全場拍爛手掌。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載