› 選擇地區
三藩市
紐約
洛杉磯
其他美國地區
香港 台灣 北美
 
2012年10月29日

隔牆有耳:狼爸玩潛水 謝絕紅派對 - 李八方

「狼爸」李剛十.一當晚,喺「狼仔」狼振英陪同下去到瑪麗醫院探望海難死傷者後一夜成名,蜚聲國際,否則點會有外國傳媒刊登網上熱傳嘅「小英子」陪「慈禧李剛」出巡惡搞圖呢?絢爛過後,李剛卻刻意歸於平淡,八方發現李剛喺呢個月幾乎絕迹公開場合,「潛水」為樂,可能係:人怕出名豬怕肥。一向好鍾意出外social嘅李剛,近月幾乎絕迹公開場合。八方翻查一向詳盡記錄西環官員出席大小場合嘅左報,發現李剛自從俾人話佢以太上皇姿態、干預香港事務後,公開露面嘅曝光率插水式下跌。

本月僅露面4次

佢喺10月只係出席過僅僅四次公開活動,兩次係中央喉舌媒體成立嘅周年紀念,唔可以no show,另外兩次就係中國電影展2012晚宴同埋文化藝術界國慶酒會,都係唔到唔得嗰隻;其他唔少紅色派對,中聯辦都派出其他代表出席,冇李剛份,唔知係咪李剛都唔想去呢?相比海難前,李剛9月份一口氣出席咗成八個活動,比起今個月足足多咗一倍;同2009年嘅10月嘅高峯期比較更加差天共地,當年李剛一個月公開現身逾10次。有政界中人都覺得,李剛近期好似潛咗水咁噃,冇理由喺國慶月都唔蒲頭㗎,覺得事件都好唔尋常!雖然冇人知道點解李剛忽然愛上「潛水」?但斷估都係想避吓風頭,費事再勾起市民對佢嘅海難傷痛回憶啩。mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載