蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月24日
馬上成為壹會員

隔牆有耳:新妾侍內外俱備 男人最開心 - 李八方

鐵士二號綽號「妾侍號」,上星期喺西貢舉行咗下水禮喇。雷雄德提供圖片

娶妾侍,可能係好多男人嘅夢想;陳念良律師同郭家麒醫生等16個專業人士,相信都好希望佢哋嘅「妾侍」生生性性。大家咪諗錯隔籬,呢個「妾侍」只係佢哋16個船主、旗下新帆船(鐵士二號)嘅鬼馬綽號啫。Tipsy Easy上星期已經喺西貢舉行下水禮,積極向明年農曆年嘅澳門賽進發。

鐵士號遇險沉沒

呢個「新妾侍」名副其實係「二奶」,因為佢出現之前,呢班名人已經有隻名叫Tipsy Frenz(鐵士號)嘅帆船;但今年6月鐵士號喺馬尼拉遇險沉沒,大難不死嘅船員,最後夾錢買番隻二手船做「新妾侍」,改名Easy係藉此紀念當時救起佢哋11位船員嘅貨輪「Easy Success」。「新妾侍」有乜特色?確實又比大婆有優勢嘅,事關隻船比之前長5呎,達50呎,而且又有冷氣,麻雀雖小五臟俱全,真係令人唔想返屋企咁滯。「新妾侍」上周日舉行下水禮,唔少船主包括公民黨郭家麒醫生同浸大體育系副教授雷雄德都有參與,船員仲按傳統駛去西貢嘅大廟參拜,希望天后娘娘保佑。雖然「新妾侍」比大婆有進步,但雷雄德話要「升呢」先可以見人,例如要裝多啲安全設施等,目標係明年農曆新年可以去澳門參賽。「新妾侍」縱然誘人,郭家麒笑指相信日後無福消受,事關重返議會嘅佢要全神專注立法會呢個「舊愛」。mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載