› 選擇地區
三藩市
紐約
洛杉磯
其他美國地區
香港 台灣 北美
 
2012年10月19日

隔牆有耳:
民記蔣麗芸越「潑」越「紅」 - 李八方

吳得掂認真有女人緣,除咗有局長奶媽林鄭月娥傍住擋箭,就連民建聯副主席蔣麗芸亦加入「保儉」行列,前日喺立法會議事廳動議辯論中,以潑婦罵街方式撐儉儉唔使落台,發言片段瞬間喺網絡熱爆。咦,乜蔣麗芸呢副嘴臉,咁熟口面嘅?唔少政界中人突然諗起:呢個咪《功夫》入面好潑辣嘅「包租婆」元秋?

獅吼功震懾議事廳

立法會前日討論叫吳得掂下台議案,唔單止場外有幾百人力撐吳得掂留任,場內亦有蔣麗芸護駕。當Ann蔣發言時,聲大大兼氣粗粗,以高八度聲線高呼:「唔推咪唔推囉,你使唔使炒咗佢(吳得掂)呀?」唔少政界中人即時陰陰嘴笑,話阿蔣今次「紅」硬。事實上唔少政界中人噚日繼續回味阿蔣喺議事廳嘅出位發言,有人仲話佢好似《功夫》入面個包租婆,皆因聲線語調似足包租婆獨有嘅獅吼功,一開腔就令人好「震懾」。
阿蔣呢次精湛演出,已令佢喺網上爆「紅」,率先喺立會新丁中跑出;唔少網民除咗話佢「潑婦罵街」,就連「女版劉江華」、「街市婆」、「江青」同「癲雞乸」等形容詞都出齊,有政界中人相信佢呢仗瞓身「保儉」,日後肯定更獲中央器重,名副其實越「潑」越「紅」,潑辣個潑喎。
爆紅嘅Ann蔣,話唔介意網民點睇佢,反正都係用心做事,唔係做戲。至於被指「潑婦罵街」,阿蔣一笑置之,堅持日後一樣會大大聲講嘢,因為自己不嬲都咁大聲㗎啦,陰聲細氣就唔係佢。睇嚟市民日後仲有好多機會欣賞民記元秋嘅演出喎。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載