› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

血淚史揚威海外 玩打壓政府出醜

好多嘢,政府越打壓,佢嘅聲音就越壯大。好似每年6月4日嘅維園燭光集會,又好似民間獨立音樂表演園地Hidden Agenda。轉戰觀塘同牛頭角工廠好幾年嘅Hidden Agenda,一直喺警察同消防嘅滋擾下苟延殘喘,但係佢哋嘅生命力超強,死唔斷氣之餘,最近仲衝出香港,揚名海外。
事緣Hidden Agenda今年玩自拍,將佢哋過去被打壓嘅故事製作咗一套紀錄片《Hidden Agenda》。咁啱今年8月威尼斯建築雙年展嘅香港館講到「活化工廈」嘅問題,就邀請咗Hidden Agenda將紀錄片拎去威尼斯播放。
咁都未算威,下個月《Hidden Agenda》仲會登陸日本,唔係釣魚台,而係東京同大阪。Hidden Agenda成員Kimi話,《Hidden Agenda》將會喺東京一間叫Uplink嘅書店Cafe度搞放映會。Uplink係已故日本劇作家兼電影導演生前開設嘅電影文化交流場地,到時Kimi都會出席,講述Hidden Agenda嘅血淚史。雖然呢啲放映會並唔係好似康城影展咁威威,但係Kimi話,好難得佢哋可以同世界各地經營民間音樂場所嘅同好交流。

狂搞建設 犧牲文化

希望呢套獨立影片唔會成為Hidden Agenda臨死前嘅回顧片,不過Kimi就好憂心。佢話家高速公路轉入觀塘工業區嘅路牌都變咗做「商貿區」,啟德又話要「起動東九龍」,好似Hidden Agenda呢啲咁嘅民間文娛場所,好難再喺市區搵到又平又靚嘅地方。Kimi慨嘆:「我哋搞好多文化活動,建立香港同外國樂隊音樂交流嘅機會,都叫做建設香港,但係因為政府嘅政策,搞到我哋好難生存落去。」唉!只可惜生活是一堆挫折,只可惜生命是必須妥協……

吳爽

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載