蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月03日
馬上成為壹會員

爽人物:好骰之徒堆砌浪漫

本月初,兩年一度的扭計骰亞洲錦標賽,首度在港舉行。港區搞手正是80後機械工程師陳德泉(Kim),他大學時已迷上扭計骰遊戲,自此不能自拔,創辦「好骰同盟」,又代表香港參與國際賽,甚至連結婚照,都以1,000個迷你扭計骰砌出馬賽克畫像。有商場就看中他的獨特手藝,邀請他以扭計骰砌出巨型毛澤東頭像慶祝十.一國慶,且聽這個扭計骰玩家到另類畫家的好骰達人怎麼說。

製作馬賽克結婚照

「香港嘅潮流,永遠都係一個循環。我5、6歲時,扭計骰好流行,嗰時細個,玩過一陣,好快就放低。大學時我喺科大讀機械工程,住宿舍,有人攞咗個扭計骰返嚟,六種顏色搞亂晒,一班人鬥快還原,迷到日練夜練,幾個朋友仲搞咗個『好骰同盟』,認真到定期開班教人點樣玩!
喺科大,由只有幾個人圍內玩,搞到有400會員,學生、教職員乜?都有,都係我大學時代好美好嘅回憶。我仲申請加入埋世界扭計骰協會,做埋成員,先至發現喺外國,玩扭計骰可以玩到好刁鑽,雖然都係鬥快還原,但蒙眼、單手,甚至用腳,乜?形式都有。
除咗鬥速度,原來仲可以用扭計骰砌出像真度極高嘅馬賽克畫像,好似巨型油畫咁,喺外國,一幅扭計骰馬賽克畫,大到十米八米都有,動輒用幾萬隻扭計骰砌成,放喺戶外,好似大型藝術品。一年前,我着手籌備今年10月嘅婚禮,自己咁鍾意扭計骰,於是就諗,砌一幅獨一無二嘅馬賽克結婚相,一定好有意思!
扭計骰只有六種顏色,用色有限制,要砌好一幅一米乘一米嘅馬賽克畫,砌唔難,最難反而係前期工作,搵到相,先要用電腦軟件處理圖片,要先分好色,唔係幅幅相都適合,反差大、線條簡單,效果會比較明顯。用迷你扭計骰,解像度又會高啲,好比數碼相機,1,000萬像素,點講都清晰細緻過500萬像素啦。
我嘅結婚相用三厘米乘三厘米嘅迷你扭計骰嚟砌,一米乘一米咁大就用咗1,000個,到家仲未搞掂!反而商場委託我砌嘅嗰四幅馬賽克名人畫像就搞掂晒,好似中國前領導人毛澤東同美國前總統林肯,就各用咗400個扭計骰,仲有印度國父甘地同南非前總統曼德拉,四幅畫喺上個月28日起,喺荷里活廣場展出。」
記者:呂麗嬋

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載