› 選擇地區
三藩市
紐約
洛杉磯
其他美國地區
香港 台灣 北美
 
2012年10月03日

隔牆有耳:狼爸是李剛 - 李八方

南丫島撞船意外全城震驚,前晚臨近午夜時分,中聯辦副主任李剛居然走去瑪麗醫院高調接受傳媒訪問。雖然惻隱之心人皆有之,到場睇吓咩情況亦無可厚非,但李剛面對鏡頭大大聲話已經要求廣東省派打撈船嚟香港,狼振英就咁戙喺旁邊零反應。到底佢係特首定係市委書記,抑或狼爸是李剛,咁大個仔都未識處理,要狼爸睇住?難怪好多市民睇到呢一幕都難抑怒火,全城圍插!

香港大陸化出晒面

好似專欄才女高慧然寫咗篇稿,直言「傳說中嘅西環治港正式由地下浮出地面」,CY只淪為陪襯人,潛台詞應該係「我爸是李剛,我爸幫我綁鞋帶,我爸陪我返工,我爸幫我做嘢」。作者林忌就係facebook怒插狼英係兒皇帝,「連救人都唔識,要搵『我爸是李剛』出來開記招」。好多網民睇完電視直播,都話覺得個畫面好令人反感,認為狼振英企喺旁邊成個副官咁,成何體統;又有人認為香港大陸化已經做到出晒面,溫州高鐵意外、汶川大地震之類災難,領導人總要出現喺事故現場至符合國情。唔少人感慨人命攸關,個個古思堯上身勸喻李剛行開啲,話「水不是這樣抽的」。另一方面,意外發生喺10月1日8點半左右,煙花滙演就9點開始,噚日記者會有人問發生咁大件事,點解仲如常放煙花?老實講如果CY答「了解事件需時,屆時可能放完煙花」大家都仲勉強接受,可惜佢係答「發生事故之後係咪應該取消煙花滙演,應該由主辦單位決定」。八方查過旅發局活動年曆,統籌者正是「民政事務局」,「香港廣東各級政協委員聯誼會」只係贊助,咁即係點先?mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載