蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月25日

隔牆有耳:嫻姐遊大阪
擺明激死麥美娟 - 李八方

工聯會候任立法會議員 早前大聲疾呼,話喺釣魚台主權爭議下,去日本旅行唔單止唔安全,仲係唔公義,叫政府向日本發出黑色旅遊警示制裁,成為唔少人笑柄。之不過呢頭講完,嗰頭佢哋嘅大姐大陳婉嫻,就啱啱喺大阪嘆完世界,用行動向後輩證明,去日本好安全囉。

忍唔住笑笑口

有讀者向八方提供照片,證實麥美娟慷慨激昂話要抵制日本之時,工聯會榮譽會長陳婉嫻就現身日本大阪,嘲諷工聯會明顯有內部矛盾,大阿姐點會聽條講嘢?唔知係咪為免做細嘅「難堪」,嫻姐噚日朝早去港台錄影新一輯《議事論事》時都神神秘秘,唔肯講之前去咗邊度旅行散心,只係話嗰度好多樹。有圖有真相,八方後嚟再搵嫻姐求證,佢話早喺兩個月前已經計劃去大阪行山,「仲喺深山住咗八日」。佢笑笑口話,出發前中、日都風平浪靜,反日行動未激化,當時都未有同事建議向日本發黑色旅遊警告㗎;直至返港途中,先發現原來同事有個咁嘅建議,自己同班團友都忍唔住笑笑口。嫻姐話唔想評論事件,總之尊重同事嘅決定。工聯會立法會團隊未上任已經冇晒隊形,確係失禮少少;八方噚日問過麥美娟點睇嫻姐去日本旅行,佢話家唔喺香港,唔太清楚嫻姐去過邊;重申身為工聯會社會事務委員會主任嘅佢,係代表委員會提出建議。mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載