› 選擇地區
三藩市
紐約
洛杉磯
其他美國地區
香港 台灣 北美
 
2012年09月21日

名人密碼洩一億天機

破紀錄一億元頭獎六合彩聽晚攪珠,全城男女老少連日來喪刨六合彩經,誓要一注獨得,做個億萬富豪。吳爽噚晚都發咗個橫財夢,中外名人爭住同吳爽報夢,總共提供咗六個lucky number,必中咁話。究竟呢班係苦海明燈,定係賭海奇葩呢?聽晚自有分曉,不過都係嗰句:小賭怡情,大賭好易輸鑊勁。

落選議員劉江華:9/804

發夢都估唔到自己會俾黨友李慧琼踢出局嘅禮義廉忠臣,報夢都仍然死心不息,整咗個掌心六合彩我哋嘆。大佬,即係點呀?買9號定係4號呀?馬會攪珠好嚴明好公正㗎,唔可以種票造馬㗎。

5號:蘋果教主喬布斯

蘋果教主喬布斯遺作iPhone 5面世,今日喺香港正式開售,同億元六合彩開彩一樣咁哄動。若然今期開出個5字,咁就認真應景嘞。睇番教主嘅生平,1955年出世,2011年10月5日去世,同個5字都幾夾。

7號:教育局局長吳克儉

喺7月17日秘密上京面聖嘅「唔得掂」,同個7字好有緣。自從佢上場之後,好多人都話,見到佢就不期然諗起個7字。小說家梁羽生有部《七劍下天山》,家陣特區都有條「七儉下刀山」,俾人插到飛起,都幾凄厲。

10號:球王美斯

剛結束嘅歐聯第一回合分組賽,地上最強嘅巴塞隆拿又係靠美斯嘅頭頂腳踢單天保至尊,反敗為勝。10號仔美斯買六合彩,有乜理由唔係用番10號做膽?

19號:藝員楊怡

沿途與他車廂中私奔般戀愛,再擠逼都不放開;祈求在路上沒任何的阻礙,令愉快旅程變悲哀……唔知點解,楊怡報夢時毫不猶豫就揀咗呢個冧巴。不要問,只要信。

23號:特首梁振英

23條立法係僭建英嘅四大政治任務之首,正如佢話自己N屆都唔選特首一樣,佢越否認就越令人堅信係真嘅。所以佢報夢推介23號,絕對唔奇怪。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載