蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月21日
馬上成為壹會員

隔牆有耳:佐王又嚟喇! - 李八方

港澳辦前副主任陳佐洱出新書,噚日喺香港搞新書發佈會,當年一句「車毀人亡」膾炙人口嘅佐洱,退休多年左王面目不改,噚日借題發揮喪鬧英國一直當香港係「獲取亞洲最大財富的提款機」,洋人只識搵着數,其他事就who cares;又話每個公民接受國民教育係「天經地義」。老左王忽然發炮,之唔係越來越多港人懷緬殖民地風光年代,越來越抗拒中共治港。

陳情有用咩?

佐洱陳話,7.1遊行有市民舉起港英龍獅旗,近日「光復上水」更有人高舉「中國人滾回中國」牌抗議,佢見到好心痛喎,事關話呢啲只係「家事」,港人有咩唔滿意,可以向中央政府陳情。陳情有用咩?港人去湖南替李旺陽伸冤被拉,去北京入稟告日本政府侵佔釣魚台,全程被國保監視,佐洱知唔知?
佢又指回歸後國家一直為香港好,03年沙士時,為港趕製防護物品,之後又放自由行來港,總之講到阿爺對香港大恩大德。不過八方同好多香港人都記得,當年若果唔係內地隱瞞疫情,香港要死幾百人?至於開放自由行,無非係03年7.1有50萬人上街,阿爺驚香港亂,先不斷放水放人收買人心,結果一發不可收拾。家陣廣東道、上水相繼淪陷,都算益咗香港人?如果北京俾香港真普選,會有咁多人緬懷舊時?
佐洱陳本新書講回歸談歷史,唔少篇幅鬧爆肥彭,指肥彭大幅調高香港社福開支,當年車毀人亡係針對肥彭,唔係要削減港人福利;回歸15年,特區社福開支確係有增無減,狼英上場,更加係派糖不手軟,唔知佐洱有冇擔心狼英會令香港車毀人亡呢?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載