蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月19日

隔牆有耳:揪出最貴五毛黨 - 李八方

一般人都會以為五毛黨梗係嗰啲對住部電腦、足不出戶嘅毒男、憤青。其實行行出狀元啦,香港有一位專幫市建局同高官喺維基百科做「打手」嘅五毛,竟然勁到位居公營機構要職。八方今日就同大家揪出呢位相信係全城最貴嘅五毛。佢就係市建局企業傳訊總監Lawrence Yau邱松鶴!
有經常蒲維基百科嘅網友發現,有一位賬號Qshshq嘅網民,成日刪改一啲同市建局有關嘅條目,好似利東街抗爭咁,原本個版本係鬧爆市建局嘅社區評估係「一份有軀殼無靈魂的報告」,令居民失去保障。但有人改咗呢個條目喎,講到經市建局插手下,成個計劃又有「太陽能熱水系統、先進的省電照明設備」,變咗成個環保天堂咁。

專刪不利政府資訊

呢位Qshshq修改嘅嘢,唔單止唱好市建局,仲連對林鄭月娥同陳茂波嘅評價佢都理埋一份。例如加入埋林鄭做「市區重建」作風「實幹」。陳茂波嘅條目就仲堅,之前明明有網民留咗條link講劉迺強話過陳茂波,「不管他如何無能,甚至無恥,只要他不犯法,一段時期都要好好保住。」但呢句嘢後來又比Qshshq刪咗喎。
網友起底後,發現呢位Qshshq,原來就係市建局公關阿頭Lawrence!Lawrence噚日直認自己係有份改嘢,但佢話因為維基賬戶要用人名登記,佢要update市建局資訊先至咁做。咁點解要改埋林鄭同陳茂波啲嘢?佢話林鄭因為有做到市區重建工作;陳茂波單嘢,原來佢係想整番好一啲同張震遠有關嘅資料,但係就「錯手」刪錯咗其他嘢喎。佢話所有改動都係以事實為本,自己亦有喺網上提供個人資料以示問責。有網友就睇唔過眼,打算日內改番啲資料,「光復」歷史真相!

姓名:邱松鶴Lawrence Yau
職位:市建局企業傳訊總監,曾任職貿發局、無綫電視
五毛功績:更改維基百科多條批評市建局的條目,如利東街等;刪去對陳茂波的批評

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載