蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月14日
馬上成為壹會員

隔牆有耳:黑TV頂癮悼劉江華 - 李八方

哀我江華!禮義廉嘅極品劉江華落敗,唔單止對「建設派」帶來沉痛打擊,連「破壞派」都係一夜之間,痛失一件略為有少少「質素」嘅對手。冇咗「江華同志」,未來四年嘅日子叫大家點過?
事隔四日,大家嘅心情仍未能平服。連最新一期《黑紙》都拎嚟做題材,仲學足近日幫亞視收視起死回生嘅cult劇《ATV焦點》,整番集《黑TV焦點》之「建設派大勝破壞派,劉江華同志壯烈犧牲」黑白片做宣傳。
最頂癮係佢哋唔知喺邊度搵把同ATV旁白差唔多嘅女聲,有聲冇氣咁話:「建設派中流砥柱、愛國勇士劉江華同志,被破壞派人士以垃圾桶遮蔽其中一塊美麗嘅選舉橫額,以致流失大量有潔癖嘅選民選票」,不過建設派會好好學習劉江華高尚嘅「真誠.MY.香港」情操。好一個「MY」字,相信係佢哋對江華同志嘅客觀評價。

「你係咪人嚟嘅呢?」

至於阿主角江華同志,佢噚朝先上電台、晏晝又去謝票。畀人玩咗幾日,佢好淡然話自己係民建聯嘅標誌性人物,發言內容又鮮明,自然有人支持、有人反對。就算主持點樣刺激佢,甚至問佢「你係咪人嚟嘅呢?」、「覺唔覺得被放棄?」佢都好似條死魚咁,總之尊重選民決定。
江華同志之「死」,除咗係選民離棄佢之外,有陰謀論就分析,認為禮義廉根本唔想呢件「政壇二五仔」有機會問鼎民記主席,加上佢既然出戰超級區,喺新東嘅選票,亦已成功過底畀陳克勤、葛珮帆同龐愛蘭,令佢變得已冇利用價值,所以畀禮義廉用完即棄。係咪咁恐怖?共產黨嘅嘢,真係話唔埋㗎。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載