› 選擇地區
三藩市
紐約
洛杉磯
其他美國地區
香港 台灣 北美
 
2012年09月13日

隔牆有耳:狼班子「武」得頂 - 李八方

論武功,俗世中不知邊個高!狼振英自從7月上任以嚟,日日都處於戰爭狀態,連好打得嘅林鄭都搞到要用眼淚告急,問責官員冇番兩度散手,真係唔死一身潺。喺新紮副局長當中,八方聽聞,新科保安局副局長李家超,原來係氣功高手,功力仲勁到打通咗任督二脈㖭。

李家超打通任督二脈

55歲嘅李家超,練咗氣功多年。聽聞佢修煉嘅係「自發功」,呢種氣功冇特定招式,全靠內氣運行,帶動個人做出唔同嘅自發動作,強身健體,聽落確係有啲玄幻。有接觸過李家超嘅人同八方講,佢嘅功力已達爐火純青地步。話說有一次佢運功期間,突然覺得體內有一股澎湃嘅氣在體內運行,當時仲好擔心會唔會走火入魔,點知冇耐之後,突然覺得血氣上湧,就咁打通咗任督二脈!咁功力到咗呢種境界,又有乜特別呢?原來佢自此就可以喺體內任意運氣練功,唔使好似以前咁,要郁手郁腳發招。家佢揸緊車又可以運氣、開開吓會又可以發功。第日出嚟答記者問題時,隨時都可能運緊功㗎。但功力咁高,拆唔拆到政治炸彈就要試過先知啦。狼營另一武林高手,就係財爺曾俊華。佢平時做嘢好似hea吓hea吓,但劍術好叻就係人都知,原來佢今年政府換屆之前,曾諗過一旦冇得留低,會上武當山拜師學太極。查實佢平日向記者、議員耍太極已步入化境啦,咁都仲諗住上山學藝,真係學無止境!mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載