› 選擇地區
三藩市
紐約
洛杉磯
其他美國地區
香港 台灣 北美
 
2012年09月10日

隔牆有耳:按金冇回頭 佢哋都賺咗 - 李八方

求學不是求分數,參選都唔一定求當選嘅。唔少立法會候選人入閘時都自知冇咩勝算、得票未必夠3%,按選舉法例要沒收5萬蚊按金。之不過,佢哋參選期間嘅收穫,有時遠超5萬蚊啦。就算輸咗都係賺咗兼贏咗,睇睇呢5位候選人就知。

事旦男 踩TVB賺名氣

一舉成名嘅事旦男何家泰(圖),就算喺港島區輸咗,都肯定係贏家,事關以狙擊CCTVB為參選議題嘅佢,成功以候選人身份喺CCTVB選舉論壇上挑機,除咗鬧爆CCTVB染紅,仲唔點名批評新聞總監袁志偉係花蟹,為唔少港人出一啖氣;就算被沒收5萬蚊按金,已經賺凸啦!
事旦男噚日喺灣仔同銅鑼灣舉牌時都特別落力,佢話選舉後會暫時退隱,日後再有大件事出現,先再出嚟「良心舉牌」。

林依麗 成功狙擊鼠王芬

靠狙擊梁美芬、「鞭打」蔣麗芸而聲名大噪嘅九龍西林依麗(圖),喺電視論壇嘅表現令人拍案叫絕,窒到兩個左女冇聲出。林依麗噚日一見到八方就狂數梁美芬炒樓唔認數。佢脫下瑪麗蓮夢露白色長裙,喺老巢佐敦拉票。
曾經破產嘅林依麗聲言選埋今屆就同粉絲講拜拜,話要退休享受人生:「始終我年紀開始大喇!」但係佢話退而不休,今後繼續監察政府同破產管理局,當然唔少得會繼續監察梁美芬啦。

龐一鳴 單車拉票倡環保

大批候選人用花車宣傳,新東龐一鳴(圖)就以單車迎戰,競選期間一直踩住單車喺新東各區拉票;噚日最後一擊,當然出動架戰車做宣傳。佢承認支持度唔算好高,但慶幸今次參選可以吸引到一班以前未必投票嘅選民去履行公民責任。
龐一鳴呢招獨家單車拉票為呢次選舉帶嚟唔少新氣象;就算落選、甚至得票少到攞唔番選舉按金,龐一鳴都話唔排除2016年捲土重來㗎。

譚香文 那些年有人記得

喺九龍東參選,諗住循直選重返議會嘅譚香文,假假哋都喺05年立法會就政改方案投下關鍵否決票;一句「the lady is not for turning」,更令佢喺當年獲封為「新民主女神」。至於係咪攞到3%支持呢……八方都覺得有啲難以預測。香香公主噚日游走九東內多間酒樓洗票(圖),有茶客仲記得佢「那些年」,總算係佢今次參選嘅最大收穫嘞。

何君堯 五萬換發叔支持

上屆立法會喺法律界敗選後,律師會前會長何君堯(圖右)今屆挾住屯門鄉事委員會主席之名,勇闖新界西參選。何君堯雖然有屯門同元朗部份鄉紳支持,但係仍然唔夠數㗎,所以佢喺選舉期間主動同鄉議局主席劉皇發冰釋前嫌,結果就係──佢最終都得到發叔「寬恕」,攞咗發叔嘅支持同意書。一次選舉換嚟一個和解,呢五萬蚊都算抵啦。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載