蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年09月05日
馬上成為壹會員

隔牆有耳:選舉論壇經典一刻 - 李八方

今屆立法會嘅選舉論壇,有唔少經典時刻兼至hit金句;部份候選人嘅衣裝同道具,更成為一時佳話。既然一人一票選港姐都係爛尾收場,八方索性開宗明義,擺明以一人小圈子嚴選今屆經典時刻,喺度整個豬肉頒獎禮;希望選民重溫後,可以喺9月9日做個明智嘅決定!

冇普選唔嫁

講明要做港島「陳七」、力爭尾席嘅公民黨陳淑莊,喺有線論壇上俾新民黨葉劉淑儀老屈,被質問因為從政而犧牲愛情,有咩咁巴閉?已經受情傷嘅Tanya火都嚟,義正嚴詞反擊:「我從來覺得從政唔係犧牲」。
越講越有火嘅Tanya,語帶哽咽話能夠服務市民係佢終身榮幸,香港無普選先弊傢伙,最後高呼:「我講過爭取到有普選先至結婚」,成為今屆選舉論壇最激動人心嘅時刻。

重溫: http://www.youtube.com/watch?v=Xj5cLwg8IxU

拉票棟篤笑

向來思辯了得嘅民建聯曾鈺成,既然瞓低選都贏,又何須同對手咬牙切齒辯論搶票?早前佢喺無綫港島選舉論壇上,索性喺總結時間整場個人棟篤笑,用抵死過癮方法論盡各大政黨,做埋手勢高叫:「撐社民連,上街!撐人民力量,上網!撐公民黨,上court!撐蕭若元,拍玉蒲團!選議員?大家仲係要選民建聯!」呢幾秒發言令全城爆笑,唔少人連日不斷重溫,肯定係今屆至hit選舉金句。

重溫: http://www.youtube.com/watch?v=qnpsusokRBs

葉劉現形記

即使set咗個新髮型、除咗副黑超,浸完鹹水從良後嘅新民黨主席葉劉淑儀,終於喺有線電視嘅選舉論壇上現形。當佢自稱成功為市民爭取6,000蚊時,即時被全場噓爆,近期少有被挑機嘅佢即時回應:「咁冇禮貌,學咩人選立法會呀!返番去幼稚園接受再教育啦。」
就係呢一幕,唔少人話:03年嘅葉劉,返咗嚟嘞。嗰種霸氣,八方喺螢光幕外都覺得好震懾,堪稱今年論壇最難忘一刻。

重溫: http://www.youtube.com/watch?v=4lYUb2MBpQM

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載