› 選擇地區
三藩市
紐約
洛杉磯
其他美國地區
香港 台灣 北美
 
2012年08月31日

沙膽虹手記:住宅樓根本冇得炒 - 沙膽虹

炒樓人士一般都傾向低調,唔想將自己身家曝光,更唔會公開寸政府,一來財不可露眼,二來唔想稅局開正「快勞」調查有否避稅,但前日卻有位初生之犢炒家,透過中原地產代理,安排記者逐家訪問,大談自己的炒樓經,話自己最近沽出兩個太古城單位,扣除雜費和上繳政府百萬元額外印花稅後,仍賺九十萬,又話三十二歲的他,曾買賣過二十個物業,過去三個月就沽出咗五個,還預計梁振英會出招,樓價明年會跌兩至三成。如此高調的炒家,令沙膽虹十分好奇他甚麼葫蘆賣甚麼藥?而且佢講到炒樓好似好容易賺錢,更令沙膽虹擔心有人信以為真,撲去炒樓而焦頭爛額。事實上,住宅樓根本冇得炒!
照呢位炒家咁講,佢賣出持有一年多的兩個太古城單位,賺了九十萬,至於另外三個單位淨賺多少,他沒有透露,可能也只是數十萬,五個單位加加埋埋市值分分鐘近二千萬,一買一賣的佣金、釐印、貸款利息、管理費、地租、額外印花稅共一百多萬,扣除所有成本才賺一百多萬,可謂天一半地一半,本大利小,收益與風險根本不成正比,已間接證明了額外印花稅實施後,住宅樓已好難短炒。更何況銀行已有正面信貸資料庫,現在根本不可能像過去般在五間不同銀行借五個物業貸款,而互相不申報;若要坦誠申報,同時做五個樓按,即使現時利息低企,亦要有雄厚財力和超高薪金才能獲批,特別是擺明車馬炒樓而非自置的物業,銀行批核更嚴,所以要像這位炒家能同時炒五項物業,又獲銀行貸款,非高薪厚祿或財力雄厚不能做到!咁高調的炒家,想唔俾政府查都難!
沙膽虹

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載