› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

隔牆有耳:偽術大師 狼振英堅高超 - 李八方

狼振英口才一向好了得,估唔到7.1上任後,語言「偽」術更上一層樓,發展出一套狼振英模式嘅「偽語錄」,答完查實冇答,但又答到好似好有誠意答咁款,難怪連口才專家張堅庭都話狼振英講嘢技巧相當高超,有啲似「千層蛋糕」喎。點解似千層蛋糕?張導演話狼振英真係好識講嘢,「運用好多語言嘅灰色地帶」,即係好似蛋糕有幾層,每層都唔同味,滿足唔同人,但冇講實在嘢,要再解釋嘅。佢話鍾意嘅可以話佢講嘢好有技巧,唔鍾意咪叫巧言令色囉。八方就覺得,呢啲查實叫「功力」,講咗好多嘢又令人聽完好似冇聽過,普通市民點學呀!

三個標準「偽」回應

八方聽聞喺政務官圈子中,7.1後流傳一套狼振英模式嘅「偽語錄」。有AO話佢哋綜合所得,發現狼振英有三個標準「偽」回應,最常用嗰句係:「呢個問題我已經講過好多次,冇嘢要補充」;有時亦會話:「其實我已經回應過呢個問題,詳情可以睇番新聞稿」;最後一個標準答案係:「我留意到社會上對呢個問題有唔同睇法,我返去會了解吓」。雖然以上三大答案內容虛浮空洞,但呢位AO話,一般市民聽完可能會覺得狼振英好有heart,反而會怪責傳媒,點解問完又問?又或者會覺得,佢都話會去了解吓啦,傳媒何須苦苦相逼?睇怕一代語言「偽」術大師,狼振英當之無愧。mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載