› 選擇地區
三藩市
紐約
洛杉磯
其他美國地區
香港 台灣 北美
 
2012年08月24日

隔牆有耳:那些年的暴動 夜深出稿有報應 - 李八方

夜晚至出稿,博你睇唔到!發展局長謬波喺午夜11時59分發新聞稿回應劏房醜聞,人人鬧爆。估唔到禿鷹有樣學樣,佢老哥粒聲唔出飛上北京密會港澳辦主任王光亞,又同公安密斟反恐,點知俾人喺飛機度撞破,佢又揀晚上10時31分出稿自爆。睇嚟深夜出稿已經成為梁班子嘅指定動作,想博報紙改唔切版,做細單醜聞。但係有資深官員同八方講,咁夜至出稿,係會有報應㗎!
呢位資深官員話,幾十年前,政府都試過一次係凌晨至出稿公佈大新聞,結果搞到暴動,你冇睇錯,真係暴動!話說1984年1月11日,當時嘅運輸司施恪要大幅提高的士首次登記稅六倍同的士牌費四倍,為咗唔畀機會啲的士大佬逃稅,就喺當日凌晨兩點由新聞處出稿公佈一項保障公共稅收令,新稅收及收費即時生效,法例係同日下晝就提交當年嘅立法局。

防暴警察放催淚彈清場

當時揸夜更嘅的士大佬一聽到新聞報道,即時號召行家罷駛,抗議政府㩒住搶;到日更司機瞓醒,就接力加入,結果全港的士大罷駛。到罷駛第三日,的士塞滿成條彌敦道,交通大癱瘓,當晚旺角就有不法分子乘機搞事,四出搶掠同破壞,結果要出動梁振英最鍾意嘅防暴警察,施放催淚彈清場至平息到呀!事後立法局班議員都好不滿,大鬧政府凌晨出稿宣佈加稅呢種做法好唔恰當,否決咗加稅同加費嘅法例。前事不忘,狼振英你要睇路呀!

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載