› 選擇地區
三藩市
紐約
洛杉磯
其他美國地區
香港 台灣 北美
 
2012年08月17日

隔牆有耳:狼英未登陸ISD插旗 - 李八方

狼振英都做咗特首成個幾月,但似乎好多政府部門仲心繫煲呔。八方有證據㗎,話說啟豐二號成功登島,日本仔拉人封艇,振英哥即晚就執行阿爺密令,召見日本駐港總領事;但政府新聞處(ISD)出稿嗰時,竟然將「梁振英」寫成「曾蔭權」,可見振英哥未能喺新聞處插旗,ISD主權仍屬煲呔。

奧運以煲呔之名發祝賀

有讀者向八方報料,留意到當晚新聞處喺Twitter英文版發放嘅一條訊息,竟然係「ChiefExecutiveDonaldTsangsummonsJapaneseConsulGeneralonDiaoyuIslandsincident」,特首依然係煲呔而非狼振英。
呢次絕對唔係個別事件,皆因新聞處較早前出一條有關狼振英恭賀香港運動員喺倫敦奧運比賽嘅Twitter新聞時,亦係稱呼特首為DonaldTsang,而呢條短訊足足存在咗成三個鐘咁耐㖭呀,陰公。
嘩!連續兩次喺Twitter斷正,新聞處仲唔係掛住港英餘孽煲呔曾?佢哋膽子都算大嘞,擺明唔妥狼振英啫!咁又係嘅,新聞處以前最多都只係做政府喉舌,但呢兩個月就要學習說話的「偽術」、學捉字蝨,正常人都頂唔順啦。但狼振英有仇必報㗎喎,未來一定會搵機會揪出幕後寫手,一係燉冬菇,一係令佢喺官場止步,新聞處中人要小心吖。新聞處發言人回覆,錯誤係由於未及時更新Twitter賬戶嘅發佈程式,現已修正,並將有關推文刪除。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載