蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月12日

寄語港足球員 退役後路難行
名將羅偉志淪為扯皮條

【本報訊】倫敦奧運今日深夜落幕,港將李慧詩為香港取得一面單車銅牌,贏盡讚美。然而風光背後,運動員的出路艱難,不少人為了餬口而奔波。《蘋果》接獲線報,指曾被譽為香港最佳右翼的前港隊足球員羅偉志,淪落為「扯皮條」,依靠賣澳門色情場所套票維生;記者在港澳碼頭找到這位昔日名將,他坦言自己「唔係偷、唔係搶」,只是為了生活要努力搵錢。
記者:葉競科、陳兆剛、周子惇

相關新聞:加強協助設就業計劃 保障退役運動員

現年47歲的羅偉志球壇綽號「黑仔志」,85年在甲組班霸南華出身,司職右翼,運動員生涯曾多次入選港隊、出戰亞洲盃、亞運會等國際賽事,直至另一右翼球星李健和冒起,兩人在南華及港隊所踢的位置都重叠,羅的鋒芒被蓋過,90年代末,他淡出港隊,曾以球員兼教練身份帶領甲組球隊,正式退役後曾執教過青年隊。

「我唔係偷唔係搶」

羅退役時從事保險業,但《蘋果》接獲線報,指他近年既無做保險亦無教波,而是在信德中心一間專賣澳門色情場所套票的旅行社打工,變身「扯皮條」。日前,記者在該旅社發現羅的蹤影,見他長時間站在門外,向路過男子兜售套票。記者佯裝客人問價,他隨即介紹套票「特色」。
「我哋公司有兩間桑拿場,其中新口岸嗰間女仔激啲,價錢亦平啲,你可以考慮;兩間場都有遊戲玩,你喺休息室等候期間,個場會播放音樂同校暗燈光,全部女仔出嚟兜圈;音樂一停,咁啱行到你個位嘅女仔會坐喺你大髀,搞下你錫下你,你又摸下佢、揸下佢咁囉!」
介紹色情服務,言辭難免露骨,但總的來說羅不失斯文,還懂得比較不同桑拿的服務優劣,勸記者在桑拿度宿節省酒店費用。記者稱他很面善,似是體壇名將,羅大方承認說:「係呀,我叫羅偉志,以前係踢波嘅,不過家好少接觸體育界囉!」
其後記者表露身份再到旅行社找他訪問,他說,退役不久發現保險業越來越難做,逼不得已轉行。他雖然持有足總B級教練牌照,但教班不足餬口,考慮到自己亦不擅長到電視台講波,故絕迹體育界。
記者問他拋頭露面兜售色情套票,會否覺得尷尬。羅坦然說:「我喺呢度都做咗幾年,唔少球迷認出我,仲要求合照;其實我都係做嘢啫,況且澳門夜生活咁蓬勃,我覺得呢行都好平常。最重要係我既唔係偷、又唔係搶,我毋須要為工作性質覺得羞恥。」他還透露自己在上址工作前,還試過做大廈保安員。
羅偉志不認為昔日不懂為前途鋪路,才導致今日困境,「喺香港做職業球員,空閒時間好多,但當年我冇爛玩爛蒲,反而儲錢供甩咗層樓,起碼唔憂住。家我哋兩公婆落力搵錢,只係為生活同埋供3歲囡囡讀書」。

相關新聞:風光過後中國金牌名將 下場慘淡者眾

「應放下明星包袱」

羅偉志稱,香港足球員的前景毫不明朗;相對於獲政府資助的體院精英運動員,後者福利及前途算較佳,起碼有穩定薪金、可憑體育成就入讀大學,退役後甚至可獲安排工作。
作為球壇名將,羅偉志不忘在訪問中寄語後輩,「做運動員,一方面要做好自己本份,但同時應該學多啲嘢,例如讀書;退役之後,就應該放低體育明星嘅包袱,唔好介意由低做起,盡快邁向另一階段」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載