› 選擇地區
三藩市
紐約
洛杉磯
其他美國地區
香港 台灣 北美
 
2012年07月31日

隔牆有耳:黃楚標密謀買起《新晚報》 - 李八方

鄭經翰創辦嘅DBC數碼電台傳出俾西環打壓,搞到滿城風雨。大班狂抦揸住20%股份嘅全國政協黃楚標唔肯注資、唔肯配新股、又唔肯出讓手上股份,無非係想DBC清盤。八方聽聞,呢位黃楚標滿腹傳媒大計,左手揑住DBC,右手謀密買起《新晚報》做免費報,準備隨時登基做傳媒界「新左王」。
黃楚標喺內地從事房地產生意,西環要佢做打手並唔出奇。但八方聽聞,黃楚標其實唔想DBC執笠;佢唔注資嘅背後目的,係想逼大班出讓埋手上股份,等佢可以將DBC完全赤化。

相關新聞:隔牆有耳:羅范寶哥哥「劏班」飯局

傳聞注資三億元

知情人士同八方講,黃楚標近年積極部署進軍香港傳媒業。除咗入股DBC,前排傳出《新晚報》準備以免費報形式復刊,並獲內地富商每年注資三億元燒銀紙,據聞呢位神秘富豪就係黃楚標。明眼人一睇就知佢想成為新一代「左王」媒體大亨。八方打咗兩日畀黃楚標,但一直飛去秘書台冇覆。
雖然本港嘅防火牆條例,規定媒體老闆唔可以擁有跨媒體,例如唔可以同時經營報紙同電台,避免製造傳媒霸權;但條例只係紙老虎,好似「小小超」李澤楷當年透過信託基金持有股份,咪同時控制now電視同《信報》。
自03年7.1大遊行後,北京好重視輿論戰,積極收編本港傳媒,委任唔少傳媒老闆做政協;近年更索性透過紅色商人或有官方背景財團,直接收購本港傳媒機構。今次傳出由黃楚標泵水搞免費報,香港人要打醒十二分精神喇。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載