蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月25日

隔牆有耳:四台涉虐待
記者做live搵命博 - 李八方

強颱風韋森特吹襲香港,一眾打工仔噚日都急急腳返屋企避風。不過,前線記者就繼續搵命博,為市民報道最新嘅風暴消息。
唔知點解,今次大部份電視台都派出女記者喺戶外做live。好似無記咁,11點晚間新聞就有成三個記者分別喺旺角、杏花邨同埋大埔白石角做live。其中被派駐喺杏花邨外嘅汪溟曦同埋李盼儂就最陰功。無論喺8號風球、定9號風球,汪阿姐都做足成分鐘live,全程企都唔穩;一隻手要㩒實個頭盔、另一隻手就攞住支咪,風雨仲打落佢塊面到,連對眼都擘唔大,睇見都覺得痛。李盼儂就企喺岸邊,全程面容扭曲,講句嘢都難,容乜易吹咗佢落海!

可憐女記者 食嘢補充體力

亞視仲慘無人道,8號風球下,記者李靜愉喺最食風嘅西灣河做live,連頭盔都冇個,只能挨住幅牆自保。
至於有線新聞林海容,喺西灣河直播期間,正正係10號風球,企都企唔穩,要扶住個欄借力,海容仲話見到一堆玻璃橫飛,相當凶險。聽聞佢喺小休期間要不斷食嘢補充體力。
now新聞記者張傑威係今次少見嘅男丁,佢勇到係東區裁判法院外一路行一路做live,但敵不過強風,個頭盔吹走咗,連眼鏡都冇埋。唔少網民都覺得電視台咁做係虐待前線記者,有網民仲改圖要求電視台停止安排記者係颱風期間做戶外直播。

亞視DIY慳得就慳

亞視新聞資源就唔多,但有時佢哋勝在識靈活變通。好似噚日朝早咁,佢哋有部採訪車俾樹枝勾爛咗個車牌(圖);但晨早流流、當時八號波又未落,邊度搵到車房整車喎。於是乎,有人咪急中生智,用黑膠紙喺車前貼上個車牌冧巴,頂硬上照開工囉。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載