蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月12日

老婆入中國籍失敗
喬寶寶被迫撤出香港

香港特區護照獲144個國家同地區免簽證,可以話一本護照在手,世界通行,估唔到呢本護照竟然成為以誇張騎呢見稱嘅印度裔藝人喬寶寶事業同家庭嘅救命符。
喬寶寶噚日喺facebook求救,話佢喺香港定居22年嘅老婆申請唔到香港特區護照,搞到喬嫂嫂唔方便經常去英國照顧患先天性脊椎神經問題、兼有過度活躍症嘅細仔,擁有居英權嘅喬寶寶焗住返英國坐移民監,放棄喺香港搵銀機會,瞬即引起唔少網民熱論。

搵平機會林煥光幫拖

喬寶寶同吳爽講,佢大仔明年喺蘇格蘭大學畢業,最唔放心係9歲有病嘅細仔,為咗呢個仔嘅成長,就賣咗香港層樓,諗住老婆港英兩邊飛照顧佢哋三父子,自己就繼續喺香港搵錢。
印度籍嘅喬嫂嫂今年2月向入境處申請加入中國國籍,以便攞特區護照,方便免簽證出入英國,點知唔批,又冇交代原因,「我都想知衰乜嘢,入境處以乜嘢指引審批,我老婆仲可唔可以再申請?」
喬嫂嫂家唯有用印度護照去英國,但只能逗留180日,而且每次進出要相隔至少半年,喬寶寶被迫去英國坐移民監。佢已經搵律師幫手,仲考慮向平機會求助,睇吓係咪同種族問題有關,唔知主席林煥光會點幫佢呢?
入境處就話,申請人放棄原有國籍同埋要定居香港,就可申請加入中國國籍。
吳爽聽聞今次喬寶寶兩公婆衰在一早向外宣稱舉家移居英國,所謂國有國法,家有家規,有關方面自然唔批。不過,喬寶寶唔使咁灰,喬嫂嫂仲可以再申請,但批唔批就另一回事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載