蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月05日

中環在線:海譽窗台佔咗半間房 - 李華華

長實(001)樓盤一向出名「有特色」,五樓可以係地下,喺堆填區附近就心曠神怡,近日網上瘋傳長實新盤屯門海譽其中一間房嘅相,間房個窗台佔咗成間房一半有凸,真係細到你唔信。
華華堅要畀個讚長實,事關呢間唔夠60呎嘅房查實係工人房,工人房都有窗有景,張床褥頂多放喺窗台上面,唔係馬桶上面,工人姐姐有得瞓呢間房,多謝長實都嚟唔切,兒歌天后Purple姐姐見到呢個間房就真係要檢討吓!
讚完工人房,更要「讚嘆」個多用途房。睇番海譽樓書,每個單位都有個勁大窗台嘅多用途房,個房同個工人房差唔多款,大小相若。好多樓盤都有多用途房,但通常係一個密室,或者得一個窗,畀人放吸塵機、麻雀枱、行李箱呢類大型雜物。

六個窗台令人讚嘆

長實整個有窗台嘅多用途房畀業主,業主可以發揮創意,用嚟種花又得,養魚又得,整張床褥喺窗台上面做多個睡房都得。華華思疑,長實位建築師睇得劏房嘅新聞多,因而有呢個咁令人讚嘆嘅設計!
海譽係長實少有發展嘅單幢樓項目,共有40伙,一層兩伙,以睡房計,分開三房同四房單位。A室嘅四房單位,全屋足足有六個窗台,真係發水發到盡!
長實舊年推海譽份新聞稿寫話「戶戶為四房或以上的特色單位,當中包括18間四房單位、18間五房單位以及4間超級特色戶」,原來長實一早將有窗台多用途房變成賣點之一,多用途房都係房,你又真係吹佢唔脹喎!
李華華
mailto:LiWaWa@AppleDaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載