立法會換屆，無論有幾多工作未完成，7月18日都要準時「收爐」。八方呢排聽完立法會大會，都差啲有幻聽，因為人民力量由替補惡法開始打拉布，到家五司十四局，三不五時就要求鳴鐘點算人數博流會，所以收工後個腦都仲聽到「咚﹗咚」鐘聲。
點知喺噚日本應風平浪靜嘅續會上，因為白鴿黨FBI涂謹申有樣學樣要求點人數，點知失驚無神玩大咗，情況就好似北韓領導人㩒咗個核彈發射掣咁，搞到個會真係流咗呀！
民主黨割席否認拉布
流會之後，傳媒想搵涂爸爸做回應，點知阿涂又突然間冇咗影喎，莫非驚到要着草？八方後來搵返阿涂；佢解釋，點人數只因「太肉緊」條審議中嘅《2011年個人資料（私隱）（修訂）條例草案》，想多啲議員聽到佢嘅理據。「點會有心拉布，我以為實夠人」阿涂今次無心插柳玩大咗，連唔在場嘅黨友李華明、黃成智、張文同鐵頭仁都畀佢玩謝埋。
民主黨副主席劉慧卿同黨團召集人李華明惟有急急出來補鑊，話民主黨唔支持拉布，事前亦唔知阿涂會要求點人數。卿姐又真係大人有大量，話唔會追究阿涂。不過，八方覺得，開會係議員責任，如果會議期間有逾半議員不在席，其實都好難向公眾交代囉。查實唔少泛民同建制派議員都暗中多謝「金正涂」，皆因流一次會佢哋又可以放多兩日假。
mailto:pf_lee@appledaily.com
