蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月23日

東涌灣奪命泥灘 水越深蜆越肥
五日賺一萬 摸蜆搵命博

水漲浪急,陷阱處處的東涌灣泥灘,一個月便有兩名摸蜆市民遇溺身亡。《蘋果》發現該死亡泥灘幾乎每日都吸引數以百計的摸蜆人到來,全因肥美的東涌蜆有價有市,摸蜆人落水越深收穫越豐,記者直擊不少新移民為了生計,摸蜆不惜攞命博,甚至有專業摸蜆人一個月摸五日,便可賺逾萬元。
記者:關震海 黃江奇 蕭逸居

相關新聞:摸蜆餬口搵食陳太 夏天摸蜆食足一年

周二正值農曆初一,記者踏足東涌灣侯王宮對開的泥灘,發現海中比岸邊的人多。岸邊30多名婦人手持鐵鈀埋頭掘蜆,水深至小腿的範圍則集結50多人,他們大部份是逸東邨居民,當中有40歲的主婦陳太冼貴蘭,她說:「邨民逢初一、初二、十五水退先嚟,之前浸死咗都係外來人,我都未聽過逸東邨居民會浸親。」
陳太一邊拿起用風扇蓋改裝的「蜆筲箕」,篩走沙石,一邊沾沾自喜說:「我嚟玩吓啫,一日摸到30斤,上岸我就派街坊,一人一斤。」陳太指大部份邨民跟她一樣是新移民,沒閒錢消遣,摸蜆便是他們唯一的娛樂,她三年前掘蜆上癮,去年大雨也照下水掘蜆。
陳太見膠袋仍有兩、三斤餘位,水漲前仍想「最後衝刺」,向水深至腰的位置進發,見到別人在深水位收穫甚豐,不禁羨慕,「你睇吓佢呢啲幾大隻,睇吓我嗰啲幾細粒,8月就開始唔肥,過中秋就瘦,要把握機會!」據陳太經驗,原來越深水的蜆越大越重,賣出去的價錢越貴,一斤可賣20元,專業摸蜆兵團一天可摸超過百斤蜆,他們主要為「福建幫」,單單在初一至初三、十五至十六出擊,每月摸5日,收入一萬元,不過8月後肥蜆越來越少,入秋後便沒有收穫,所以謀生者趁夏天搏命到深水處覓食。

拒領綜援 自力更生

黃昏6時半,潮水上漲,水深至腰間處仍有50人摸蜆,他們拖着兩至三個白色發泡膠箱,將肥蜆放入箱內,箱滿後便逐一抬上岸,岸灘上早放滿了30多箱收穫,這些在深海冒險摸蜆的原來都是外來人。「佢哋嚟自荃灣、青衣、將軍澳,乜人都有,再遠啲係大澳漁民。」陳太指向深海處說。接近7時,記者在半米深的海中心回程,有時泥漿吸腳寸步難行,短短數分鐘已水漲半米,陳太即勸街坊「滿水喇,快啲走」,街坊仍不想離去,摸至滿意才肯走,簡直是搵命博!
「東涌蜆,10蚊一斤!」記者昨下午到逸東邨巴士站附近,見一名自稱「水上人」的秀姐拿着載滿四、五十斤的發泡膠箱兜售,數分鐘便吸引多名居民幫襯。秀姐指不想拿綜援維生才冒險掘蜆。逸東邨萬有街市海鮮檔負責人更指,東涌的沙蜆多肉且甜,比每斤賣16元的香港仔「養蜆」美味,是東涌居民熱捧海鮮,一早已售罄。

相關新聞:拾蜆為樂休閒張太 志在聯誼當做運動

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載