› 選擇地區
三藩市
紐約
洛杉磯
其他美國地區
香港 台灣 北美
 
2012年06月18日

隔牆有耳:睡魔肥平 林鄭頂唔順 - 李八方

最近政圈最熱門話題,自然係盛傳前民政事務局局長何志平重返政府,出任副政務司司長,同舊下屬、將會做政務司司長嘅林鄭月娥「拍住上」。八方每當同官府或者政界中人講起呢個「黃金組合」,無不掩住半邊嘴笑,事關政圈皆知,林鄭當年做肥平嘅常秘時,已經頂唔順肥平,據聞肥平做局長嘅時候,有招「睡夢大法」,好多見識過嘅人無不嘖嘖稱奇。
肥平做民政事務局局長嗰陣,除咗要同公務員開會外,仲要成日同外面嘅不同界別人士開會。話說有個外人,當年同肥平、一眾民政局官員開會傾業界嘢,大家你一言我一語互不相讓之際,就梗係諗住問吓局長點睇,點知呢位仁兄發現,原來肥平已經喺唔知幾時瞓着咗!
正當呢位仁兄目瞪口呆之際,佢身邊嘅公務員似乎見慣不怪,冇理肥平好夢正酣繼續開會,但好神奇係個會到尾聲,肥平又會醒番嚟個總結,好似冇瞓過一樣!

吃喝玩樂通頂就好精神

後來呢位仁兄打聽之下,先知肥平原來成日用呢招「睡夢大法」開會,唔怪得做事一絲不苟嘅林鄭成日頂唔順肥平!不過又有好事之徒同八方講,肥平又唔係見親人都瞓着,好似佢當年成日去北京「開會」,周時同班京官、文化界人士交際應酬,晚晚飲飲食食唱卡拉ok,通宵達旦一樣鬼打都冇咁精神!

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載