› 選擇地區
三藩市
紐約
洛杉磯
其他美國地區
香港 台灣 北美
 
2012年06月14日

隔牆有耳:臨別筍工益朱朱 煲呔愛將調京升官 - 李八方

煲呔雖然做多兩個零禮拜就收工,但臨走之前都不忘幫前愛將搵個好位,認真唔話得。政府噚日宣佈新一輪人事調動,曾經做過煲呔新聞秘書、現任財經事務及庫務局副秘書長嘅朱曼鈴Cathy,會喺7月18日升任駐京辦主任接替曹萬泰,成為駐京辦第一個女主任。
煲呔做政務司司長時,Cathy服侍得佢妥妥貼貼,深獲信賴,難怪煲呔卸任前都關照一下愛將,因為副秘書長屬首長級第四級(D4),駐京辦主任就係首長級第六級(D6),換言之Cathy係步步高陞。
有官場好事之徒話升級事少,反而Cathy今次坐鎮嘅係「京畿重地」,有利佢結交中央一眾部委官員,對長遠仕途有極大好處,肯定係個超筍位!

避狼上場清算

有人心水仲清呀,話煲呔都係愛「朱」深切,先幫佢遠離香港呢個是非地,話晒狼振英上場之後,點樣蹂躪班政務官都係未知之數,好彩就話搵到工較腳啫,唔好彩嘅話就要諗計外調嘞,至少山高皇帝遠,唔使驚畀隻狼玩死,何況Cathy係煲呔愛將喎,被清算風險極高!
計八方話呢,首選嘅「避狼之地」其實係特區政府駐布魯塞爾經貿辦,怕且特首幾年先去一次唔使成日招呼;駐京辦就差少少,因為特首每年例必去幾次,好彩佢去親都一定要見好多京官,相信冇乜空閒搞駐京辦!駐京辦主任雖然未算一級優差,但都係筍位,估唔到煲呔對馬仔咁鬼有情有義。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載