蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月09日
馬上成為壹會員

隔牆有耳:林D9散水酒會玩神秘 - 李八方

政務司司長林D9早就表明,7.1之後佢會遠赴英倫讀神學,唔知係咪想乘機洗清自己多年來罪孽,距離佢遠走他方日子唔夠一個月,八方收到風,林公公邀請各界人士後日星期一,去馬會會所出席一場由佢主辦嘅酒會,不過張請柬卻冇透露為乜事而搞,僅有時間、地點資料,酒會所為何事,真係耐人尋味﹗
唔少收到林公公請柬嘅人,都晒頭唔知林公公搞乜,八方本着求真精神,致電政務司司長辦公室,點知林公公嘅發言人同老闆一樣,都係「人肉錄音機」一部,發言人除咗話呢場活動宴請各界人士外,連有咩人士獲邀都無透露,至於係咪為林公公歡送、餞行,發言人一概答唔到。其實林公公離開官場係既定事實,何不大方搞歡送會呢?八方真係諗爆頭都諗唔明。
林公公進修神學,最新一期基督教刊物《天使心》訪問咗林公公,指現任司局長之中有七個基督徒,透露每星期都有一個早上一齊祈禱,呢個高官祈禱會更會一齊讀經、分享大小事情。

有信仰唔怕批評

林公公話自己有信仰支持,唔怕接受批評,對於香港政局,佢話:「我信神掌管香港。」
無獨有偶,行將退休嘅衞生署署長林秉恩,同樣喺後日搞歡送茶會,臨近6月底,八方相信退任官員嘅歡送會陸續有來,迎接未知嘅狼英新朝代。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載