› 選擇地區
三藩市
紐約
洛杉磯
其他美國地區
香港 台灣 北美
 
2012年05月24日

隔牆有耳:民記壽酒 網民惡搞踩場 - 李八方

立法會選戰仲有四個月就到,網民聲討就快20歲嘅「禮義廉」復仇聖戰,正式開波。頭炮係房委會宣佈公屋加租一成,民記劉江華叻唔切,極速出傳單「強烈反對」,點知抽水不成反捉蟲。原來當年禮義廉曾鈺成、譚耀宗、陳鑑林、黃容根等八人有份投票撐政府,「成功爭取」今日公屋瘋狂加租。高登仔即時自製「多得民建聯」海報,呼朋喚友,叫佢哋自行打印,喺公屋信箱狂派。網民同社民連更揚言會去民記黨慶酒會踩場「贈興」㖭。

自稱「匿名復仇者」

話說政府07年提出廢除公屋租金唔可以超過居民入息中位數一成上限嘅條文,工聯會,民記等建制派投晒贊成票,令草案以三票之微獲通過。有網民噚日將投票結果同埋劉江華嘅反對加租傳單整做海報,叫食開蛇齋餅糉嘅公公婆婆睇清楚邊個係賣港賊。
改圖組亦同時做嘢。前日過千網民share一張李慧琼banner,呼籲狗主清理狗隻便溺,李議員個樣擺中間,令人以為要清理佢嘅便溺。呢張相嘅改圖技術達神級程度,好多人信以為真。自稱「二創網民」向八方承認責任,原來佢哋改咗張相,將相中banner嘅狗公仔換做李議員個樣,正版banner仲喺條街原封不動。
呢班二創網民嘅復仇宣言係「我們是匿名復仇者,我們不會忘記!」部署陸續惡搞立法會民記參選人宣傳品。佢哋喪鬧民記將雞毛蒜皮民生議題放大,刻意淡化大是大非政制問題。下一個復仇目標已經鎖定:新界東嘅民記大佬,睇路呀!
另一班網民就相約緊,7月6號去民記20周年黨慶酒會「贈興」,裏面有啲係社民連成員,但八方打去問詳情,佢哋就話仲要傾傾。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載