› 選擇地區
三藩市
紐約
洛杉磯
其他美國地區
香港 台灣 北美
 
2012年05月22日

沙膽虹手記:驚動到堅哥 - 沙膽虹

沙膽虹昨日手記寫《壹週刊》記者在一個新義安叔父喪禮上,篤《蘋果》記者出嚟,搞到《蘋果》記者被人刪除照片,還幾乎被打一身,可幸最後能平安離去。文章一出,軒然大波,《壹》仔周一題目例會上,據聞老總和該組副總都好㷫,話佢哋記者並沒有篤《蘋果》記者出嚟,話沙膽虹屈佢哋!《壹》仔楊社長還向我們印刷傳媒行政總裁堅哥投訴。
老實講,《蘋果》記者做乜嘢要無中生有屈《壹》仔記者?何況,該《蘋果》記者跟該名《壹》仔記者還是認識了十多年,大家是有往來的行家!該《蘋果》同事說:「我們潛得入去做新聞,就預咗俾人趕出嚟、拆菲林,但俾一個識咗十幾年的篤出嚟,就好傷心。」
「我見到他跟一個幫會人士講了一兩句話,我清楚聽到『一個人』三個字,然後該名人士立即望向我,我當時一個人坐在一邊,接着一連串的事就發生了。」《蘋果》同事續說。該幫會人士立即走過去跟叔父的一位女家屬密斟,該女家屬於是走到靈堂門口向幫會兄弟交代幾句,途中亦望了記者一眼,未幾就有一群大漢走過來問記者:「係你啦!係邊個帶你入嚟嘅?」記者表露身份後,隨即便被帶出靈堂,刪除照片兼喊打,可幸有人喝止,才平安離去。在靈堂門口發生的一切,都有在場其他記者睇見。
至於有人話《蘋果》記者自己做唔到新聞,老屈人哋篤佢,就更加荒謬,《蘋果》記者是少數能潛入靈堂逗留一段長時間的傳媒!堅哥收到楊社的投訴後,亦第一時間打畀沙膽虹。至於他點睇?他身在台灣,雖然耳聽八方,但各執一詞,他亦無法調查,暫列「口同鼻拗」案處理咁話!
沙膽虹

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載